លោក​នាយក​រដ្ឋ​មន្ត្រី​ ហ៊ុន ​សែន​ បាន​​​ស្តី​បន្ទោស​​​ដល់​​​ពួក​​​ឧទ្ទាម​សាសនា​មកពី​​​ខាង​​​ក្រៅតំបន់​​

កាល​ពី​ពុធ​ ​លោក​នាយក​​រដ្ឋ​​មន្ត្រី​ ហ៊ុន ​សែន​បាន​ស្តី​បន្តោស​ប្រទេស​មិន​មែន​ជា​​សមា​ជិក​អា​ស៊ាន​ចំពោះជម្លោះ​ខាង​​​សាសនា​នៅ​​​ក្នុង​តំ​បន់​ និង​បាន​ជំរុញឲ្យ​​​​រដ្ឋ​​ជា​សមាជិក​​អា​ស៊ាន​បង្កើន​​​កិច្ច​​​ខិត​ខំ​ប្រឹង​ប្រែង​របស់​ខ្លួន ​​​ដើម្បី​ជំរុញ​​ឲ្យ​មាន​​​ការ​​​​​អត់​ឱន​​ទៅ​វិញ​ទៅ​មក​​​រវាង​​​​អ្នក​​​មាន​​​ជំនឿសាសនា​ខុសគ្នា។ ថ្លែង​​​សុន្ទរកថាបើក​​​​​កិច្ច​ប្រជំុ​ក្រុម​ប្រឹក្សា​សហ​គ​មន៍​សង្គម​វប្ប​ធម៌​​អាស៊ាន​​​លើក​ទី​៨​​​នៅ​ក្នុង​រាជ​ធានី​ភ្នំ​ពេញ​​​ ​​លោក​នាយក​រដ្ឋ​មន្ត្រី​សង្កត់ធ្ងន់​ថា “ បច្ចុ​ប្បន្ន​នេះ​ជម្លោះ​សាសនា​លើ​ពិភព​លោក​កំ​ពុង​ហូរ​ចូល​​ក្នុង​ប្រទេស​​​​ជា​សមាជិក​អាស៊ាន​ ដូច្នេះ ចាំ​បាច់​​ត្រូវ​​​​បន្ត​ផ្ដោត​ការ​យក​ចិត្ត​ទុ​ក​ដាក់​លើ​ជម្លោះ​សាសនា​ ដើ​ម្បី​ធានា​ស្ថិរភាព​”។ លោកហ៊ុន​ សែនមិន​​​បាន​បញ្ជាក់​ច្បាស់​​ថា​​ តើ​​​ជម្លោះ​ទាំង​នោះ​​ហូរ​​​ចូល​​​មក​​​ពីណា​​​នោះ​ទេ ហើយ​​​ក៏​​​មិ​​​បាន​​​​បញ្ជាក់​​​​ថា សមាជិក​​​ប្រទេស​​​អាស៊ាន​​​ណាមួយ​ កំពុង​​​ទទួល​​​រង​ផល​​​ប៉ះ​​​ពាល់​​​ផង​ដែរ។ ប៉ុន្តែ​​ ពួក​ឧទ្ទាម​​​​សាសនា​អុី​ស្លាម​នៅ​​ភាគខាង​ត្បូង​​ប្រទេស​ថៃ​បាន​​​ចាប់​​​ផ្ដើ​​ម​​​​​ចលនា​អបគមន៍​ជាង​មួយ​ទស​វត្ស​រ៍មក​​​ហើយថែម​​​ទាំង​​​បាន​​​បណ្តាល​ឲ្យ​មាន​កុបកម្ម​​​សម្លាប់​​​មនុស្ស​​​ផ្ទុះ​​​ឡើង​​​នា​​​ពេល​ថ្មីៗ​​រវាង​អ្នក​​​កាន់​​​សាសនា​​​អីុស្លាម​​​ រ៉ូហីុងយ៉ា ​(Rohingya)​និង​អ្នក​​​កាន់ព្រះ​ពុទ្ធសាសនា​​នៅក្នុងប្រ​ទេស​​ភូមា​​ភាគ​ខាង​លិច​​។ ដើម្បី​ជា​ការ​រួប​រួម​គ្នា​​លោក​ ហ៊ុន សែន​បាន​កត់​សម្គាល់ថា ​​​​​​​​​​​​​​ទំ​នាក់​ទំ​នង​ប្រកប​​​ដោយ​​​សន្តិភាព​​រវា​ង​ពុទ្ធ​​​សាសនិកជន និង​បងប្អូន​​​ខ្មែរ​​​​អុីស្លាម​នៅ​​កម្ពុជា​ដែល​មាន​​​ប្រហែល​ជា​​២​ភាគ​រយ​នៃ​ប្រជា​ជន​​កម្ពុជា​។ លោក​នាយក​រដ្ឋ​មន្ត្រី​បាន​ថ្លែង​បន្តថា“ ​ទោះ​បី​ជា​វា​​ដូច្នេះ​ក៏​ដោយ ក៏ការ​ជំរុញសន្តិ​ភាព​​​ចាំ​បាច់​ណាស់​ ព្រោះ​​យើង​មិន​​ភ្លេច​ថា ការ​ការ​ពារ​គឺ​ប្រសើរ​ជា​ង​ការ​ព្យាបាល​​”​៕     ប្រែ​សម្រួល​ដោយព្រំម៉ា​រ៉ា​ឌី

រដ្ឋាភិបាល​​​អនុម័ត​​​ថវិកា​​​ចំនួន​​​៣​​​ពាន់​​​លាន​​​ដុល្លា​​​រ សម្រាប់​​​ការ​ចំណាយសរុប​​​​ក្នុង​​​ឆ្នាំ​​​២០១៣

យោង​​​តាម​​​សេចក្ដ​​​ី​ប្រកាស​មួយ​​​ដែល​​​ចេញ​​​​ផ្សាយ​​​ដោយ​​​ទី​​​ស្ដី​​​ការ​​​គណៈរដ្ឋ​​​មន្ត្រី​​​កាល​​​ពី​​​ថ្ងៃ​​​សុក្រ​​​បាន​​​ឲ្យ​​​ដឹង​​​ថា រដ្ឋាភិបាល​​​បាន​​​បែង​​​ចែក​​​​​​ថវិកា​​​ជាង​​​៣​​​ពាន់​​​លាន​​​ដុល្លា​​​សម្រាប់​​​​​ការ​ចំណាយ​​​សរុប​​​​របស់​​​រដ្ឋា​​​ភិបាល​​​ក្នុង​​​ឆ្នាំ​​​២០១៣​​​ ដែល​​​មាន​​​ការ​​​កើន​​​ឡើង​​​ចំនួន​​​១៩,២​​​​ភាគរយ​​​លើ​​​ថវិកា​​​ចំនួន​​​២,៦​​​ពាន់​​​លាន​​​ដែល​​​រដ្ឋា​​​ភិបាល​​​​មាន​គម្រោង​​​​ចំណាយ​​​​សម្រាប់​ឆ្នាំ​​​២០១២​​​។  ​​​សេចក្ដី​​​​ប្រកាស​នោះ​​​មិន​​​បាន​​ផ្ដល់​​​​ព័ត៌​មាន​​​​លម្អិតថា ​​​តើ​​​ថវិកា​​បុ៉ន្មាននឹង​​​ត្រូវ​​​បែង​​​ចែក​​​តាម​​​​វិស័យ ​​​​និង​​​ក្រសួង​នានា​​​​នោះ​ទេ ​ប៉ុន្តែ​​​ បាន​​​បញ្ជាក់​ថា នឹង​​​​ផ្ដោត​​​ការ​​​យក​​​ចិត្ត​​​ទុក​​​ដាក់​​​លើ​​​ការ​​​កែ​​​លម្អ​​​ផ្នែក​​​សុខា​​​ភិបាល​​​និង​​​អប់​​​រំ​។ សេចក្ដី​​​​ប្រកាស​នេះ​​​​​​​ឲ្យ​​​ដឹង​​​ផង​​​ដែរ​​​ថា ​ថវិកា​​​​​​​ដែល​ត្រូវ​ចំណាយ​​​​ក្នុង​​​ឆ្នាំ​​​​​​បោះ​​​ឆ្នោត​​​​នឹងត្រូវ​​​ចំណាយ​​​២០​​​ភាគរយ​​​បន្ថែម​​​សម្រាប់​​​មន្ត្រី​​​រាជការ និង​​​កង​​​កម្លាំង​​​ប្រ​​​ដាប់​​​អាវុធ។ សេចក្ដី​​​ប្រកាស​នេះ​​​​បន្ដ​​​ថា “ថវិកា​​​នេះ​​​នឹង​​​​​​ផ្ដល់​​​អាទិ​​​ភាព​​​សម្រាប់​​​បង្កើន​​​និង​​​​ពង្រឹង​​គុណភាព​​ការ​ងារ​ក្នុង​​វិស័យ​​​សង្គម​​​កិច្ច ជា​ពិសេស​​​ សម្រាប់​​​​វិស័យ​អប់​​​រំ សុខា​ភិបាល ការ​កសាង​​ធន​​​ធាន​​​មនុស្ស​​​ និង​​​សុវត្ថិ​​​ភាព​​​សង្គម​”។ សេចក្ដី​​​​ប្រកាស​នេះ​បាន​​​បន្ថែម​​​ថា “ ថវិកា​នេះ​នឹង​​​ធានាឲ្យ​​​មាន​​​ការ​​​រៀប​​​ចំ​​​ការ​​​បោះ​​​ឆ្នោត​​​រដ្ឋ​​​សភា និង​​​ជំរុញឲ្យ​​​មាន​​​ការ​​​អនុវត្ត​​​ច្បាប់​​​គ្រប់​​​គ្រង​​​រដ្ឋ​​​បាល​​​រាជធានី ខេត្ត ក្រុង​​​ ស្រុក​​​និង​​​ខណ្ឌរហូត​​​ដល់​​​ថ្នាក់​​​ក្រោម​​​ជាតិ (ច្បាប់​​​​រៀប​ចំ​អង្គការ)”។ សេចក្ដី​​​​ប្រកាស​នេះ​​​បន្ដ​​​ថា ការ​​​បែង​​​ចែក​​​ថវិកានេះផ្អែក​​​តាម​យុទ្ធសាស្ត្រ​​​ចតុកោណ​​​ដំណាក់​កាល​ទី​២ ​ដើម្បី​​​ទទួល​​​បាន​​​នូវ​​​កំណើនការ​​​ងារ សមភាព និង​​​ប្រសិទ្ធភាព និង​​​ផ្អែក​តាម​​​​​ផែន​​​ការ​​​យុទ្ធ​​​សាស្ត្រ​​​អភិវឌ្ឍន៍​​​​ថ្នាក់​ជាតិ សម្រាប់ឆ្នាំ២០០៩-២០១៣​​​។ថវិកា​នេះ​ក៏​នឹង​​​ជួ​​​យ​ទ្រទ្រង់​​​​ឲ្យ​​​មាន​​​កំណើន​​​ផ្នែក​​​នាំ​​​ចេញ ​និង​ឆ្លើយ​​​តប​​​តាម​​​គោល​​​ដៅ​​​ដែល​លោក ​នាយក​​​រដ្ឋ​​​មន្ត្រី ហ៊ុន សែន ​បាន​កំណត់ ​ដើម្បី​​​​នាំ​​​​អង្ករ​ចេញ​​​ចំនួន​​​១​​​លាន​​​តោន​​​ ​​​ឆ្នាំ​​​ក្រោយ​​។ សេចក្ដី​​​​ប្រកាស​នេះ​​​​ក៏​​​បាន​​​លើក​​​ឡើង​​​ដែរ​​​ថា​​​ “ថវិកា​​​នេះ​​​ក៏​​​មាន​​​បំណង​​​ជួយ​​​រដ្ឋា​​​ភិបាល​​​ក្នុង​​​ការ​​​កែ​​​ទម្រង់​រដ្ឋ​បាល​សាធារណៈ ​ការ​​​គ្រប់​​​គ្រង​​​ហិរញ្ញវត្ថុ​​​សាធារណៈ ការ​​​កែ​​​ទម្រង់​​​តុលាការ​​​និង​​​ច្បាប់ កែទម្រង់​​រដ្ឋបាល​គ្រប់​គ្រង​ដី​ធ្លីនិង​​​ការ​​​កែទម្រង់​​​​​​កង​​​ទ័ព​​​”។ សេចក្ដី​​​​ប្រកាស​នេះ​បន្ថែម​​​ថា “ រដ្ឋា​ភិបាល​​​នឹង​​​បន្ដដំឡើង​​​ប្រាក់​​​បៀវត្សរ៍​​គោល​​​របស់​​​មន្ត្រី​​​រាជការ​​​ និង​​​កង​​​កម្លាំង​​​ប្រដាប់​​​អាវុធ ​ព្រមទាំង​​​ដំឡើងប្រាក់​​​ខែ​​​២០​​​ភាគរយ​​​នៅ​​​ក្នុង​​​ឆ្នាំ​​​២០១៣”។ ទោះបី​​​ជា​​​ការ​​​ចំណាយ​​​មាន​​​ការ​​​កើន​ឡើង​​​​ក៏​​​ដោយ ក៏​​​លោក យឹម សុវណ្ណ អ្នក​​​នាំ​​​ពាក្យ​​​គណបក្ស​​​សង្គ្រោះ​​​ជាតិ​​​មាន​​​ប្រ​​​សាសន៍​​​ថា ​ថវិកា​​​ដែល​​​បាន​​​ស្នើ​​​ឡើង​​នោះនឹង​​​​មិន​អាច​ជួយ​​​ជំរុញវិស័យ​​​អាទិភាព​​​មួយ​​​ចំនួននៅ​​​ក្នុង​​​ប្រទេស​​​កម្ពុជាបាន​ទេ។ លោក​​​មាន​​​ប្រសាសន៍ថា “អតិ​​​ផរណា ​នៅ​​​តែ​ជា​​​បញ្ហា​​​សម្រាប់​​​ប្រជា​​​ពល​​​រដ្ឋ​​​កម្ពុជា ​តម្លៃ​​​ទំនិញក្នុង​​​ទី​​​ផ្សារ​​​មាន​​​ការ​​​កើន​​​ឡើង​​​​យ៉ាង​ខ្លាំង​ បើ​​​ធៀប​​​ទៅ​​​នឹង​​​ការ​ដំឡើង​ប្រាក់​បន្តិច​បន្តួច​​សម្រាប់​​​មន្ត្រី​​​រាជការ​​​និង​​​កង​​​កម្លាំង​​​ប្រដាប់​​​​អាវុធ​របស់​​​​រដ្ឋា​​​ភិបាល”។ លោក​​​បាន​​​បន្ថែម​​​ថា រដ្ឋាភិបាល​​​គួរតែ​​​អនុម័ត ថវិកា​​​យា៉ង​​​ហោច​​​ណាស់​​​ចំនួន​​​៤​​​ពាន់​​​លាន​​​ដុល្លារ​​​ដើម្បី​​​ជំរុញ វិស័យ​​​មួយ​​​ចំនួន​​​ដូច​​​ជា វិស័យ​​​អប់​​​រំ សុខាភិបាល​និង​​​ប្រាក់​​​ខែ​​​សមរម្យ​​​សម្រាប់​​​មន្ត្រី​រាជ​ការ​។ លោក​បាន​​​ថ្លែងថា “ ប្រសិន​​​បើ​​​គណបក្ស​​​សង្គ្រោះជាតិ​​​របស់​​​យើង​​ឈ្នះ​​​ឆ្នោត​​​ឆ្នាំ​​​  យើង​​​នឹង​​​ធ្វើ​​​វិសោធ​​​ន​កម្ម​​​ ច្បាប់​​​​នេះដើម្បី​​​ដំឡើង​​​ប្រាក់​​​​ខែ​​​សម្រាប់​​​កម្មករ​​​រោង​​​ចក្រ ឲ្យ​​​ទទួល​​​បាន​​​ប្រាក់​ខែ​​​គោល​តិច​​​បំផុត​​​១៥០​​​ដុល្លារ​​​ក្នុង​​​មួយ​​​ខែ និង​​​​ប្រាក់​ខែ​មន្ត្រី​រាជ​ការ​ និង​កង​កម្លាំង​ប្រដាប់​អាវុធ​ដូចជា​នគរបាល​យ៉ាង​​តិច​​​២៥០​​​ដុល្លារ ក្នុង​​​មួយខែ”​។ កាល​​​ពី​​​ថ្ងៃ​​​សុក្រ ទី​​​ស្ដីការ​​​គណៈ​​​រដ្ឋ​​​មន្ត្រី​​ក៏​​​បាន​​​អនុម័ត​​​លើ​​​ការ​​​ចំណា​យថវិកា​​​របស់​​​រដ្ឋាភិ​​​បាល​​​ក្នុង​​​ឆ្នាំ​​​២០១១​ដែរ​ ​ែដល​នៅ​ឆ្នាំ​នោះ សេដ្ឋ​​​កិច្ច​​​កើន​​​ឡើង​​​​​​៧,១​​​ភាគរយ ​ហើយមាន​​ការ​ចំណាយ​​​ទឹក​​​​​​ប្រាក់​​​ចំនួន​​​២,៤ ​ពាន់​​លាន ដុល្លារ​​​៕  ប្រែ​​​សម្រួល​​​ដោយ ហម សុផាណ្ណា​​​​​​​​​​​​​​​​​​​​​

មេធាវី​​អះអាង​ថា តុលាការ​កោះ​ហៅ​កូន​លោក​ ខូវ ជឺលី​ មក​សាក​សួរ​ពាក់​ព័ន្ធ​រឿង​ក្តី​​​ប៉ុន​ប៉ង​មនុស្ស​ឃាត

មេធាវី​​ម្នាក់​តំណាង​ឲ្យកូន​ស្រី​របស់​លោក​​​ខូវ ​ជឺលី​ មាន​ប្រ​សាសន៍​កាល​ពី​ថ្ងៃ​សុក្រ​​ថា​កូន​​ប្រុស​ និង​កូន​ប្រ​សា​ស្រី​របស់​លោក​ឧកញ៉ា​ខូវ ជឺលី​ នឹង​ត្រូវ​កោះ​ហៅ​មក​សាក​សួរ​ចំ​ពោះ​ការ​ជាប់​ពាក់​ព័ន្ធ​របស់​ពួក​គេ​ក្នុង​ផែន​ការ​សម្លាប់​កូន​ស្រី​ម្នាក់​របស់​លោកខូវជឺលី។ ការ​​កោះ​ហៅ​របស់​តុលាការ​នេះ​ជា​​ការ​បង្ហាញ​នូវ​ដំណាក់​កាល​មួយ​ទៀត​​នៃ​រឿង​ក្តី​មួយ​​​ដែលភរិយា​របស់​លោក​ ខូវ ជឺលី ត្រូវ​ផ្ដន្ទាទោស​​រួច​ហើយ​ឲ្យ​ជាប់​ពន្ធនាគារ​រយៈ​ពេល​២០​ឆ្នាំ​​ ពី​បទ​ជាប់​ពាក់​ព័ន្ធ​នៅ​ក្នុង​ការ​ប៉ុន​ប៉ង​ធ្វើ​ឃាតនេះ។ លោកមេធាវី ប៉ាល់​ ច័ន្ទ​ដារ៉ា​ ​តំណាង​ឲ្យ​កូន​ស្រី​របស់​លោក ខូវ ជឺលី គឺ​អ្នក​ស្រី ស៊ុនសុថា ដែល​ជា​គោល​ដៅ​នៃ​​ការ​ប៉ុន​ប៉ង​ធ្វើ​ឃាត​នោះ​មាន​ប្រសាសន៍​ថា “​ខ្ញុំ​បាន​ដឹង​ថា​សាលាដំបូង​រាជ​ធានី​ភ្នំពេញ​បាន​ចោទ​ប្រកាន់​​ ពួក​គេ​រួច​ហើយ​ ហើយ​សាលាដំបូង​រាជ​ធានី​ភ្នំពេញ​បាន​កោះ​ហៅ​លោក ខូវ ផល្លាបុត្រនិង​ប្រពន្ធ​របស់​គាត់​មក​​សាក​សួរ​ផង​ដែរ”។ អ្នក​ស្រី​ ស៊ុន សុថា ជា​ភរិយា​របស់​លោក ស៊ុន ចាន់ថុល អនុប្រធាន​ក្រុម​ប្រឹក្សា​អភិ​វឌ្ឍន៍​កម្ពុជា​។ លោក ឯក​ ឆេងហួត ព្រះ​រាជ​អាជ្ញា​រង​​អម​​​សាលាដំបូង​រាជ​ធានី​បាន​បដិសេធ​មិន​ធ្វើ​អត្ថាធិប្បាយ​អំពី​រឿង​​នេះទេ​ កាល​ពី​ថ្ងៃ​សុក្រប៉ុន្ដែ លោក​បាន​មាន​ប្រសាសន៍​កាល​ពី​ដើម​ឆ្នាំ​នេះ​ថា តុលាការ​បាន​ទទួល​ពាក្យ​បណ្ដឹង​​​ប្តឹង​​​លោក ជឺលី និងសមាជិក​គ្រួសារ​បី​នាក់​ផ្សេង​ទៀត​​ក្នុង​គ្រួសារ​របស់​លោក ​​​​និង​អាច​កោះ​ហៅ​អ្នក​​ជាប់​ពាក់​ព័ន្ធ​ នៅ​​ថ្ងៃ​​ណា​មួយ​នៅ​ពេល​ក្រោយ។ លោក លឹម វណ្ណា មេធាវីការពារ​គ្រួសារ​លោកខូវ​ ជឺលីមាន​ប្រសាសន៍​ថាលោក​មិន​ទាន់​បាន​ទទួល​ព័ត៌មាន​អំពី​ការ​ចោទ​ប្រកាន់​របស់​សាលាដំបូង​រាជ​ធានី​ភ្នំពេញ​ទេ​ ដូច្នេះលោក​មិន​អាច​ធ្វើ​អត្ថាធិប្បាយ​ជាក់​លាក់​អំពី​រឿង​ក្តី​នេះ​បាន​ទេ។ យោង​តាម​លោក វណ្ណា ​មាន​ប្រ​សាសន៍​​​ថា លោក ជឺលី និង​កូន​ប្រុស​របស់​លោក​ គឺ​លោកផល្លាបុត្របច្ចុប្បន្ន​នេះ​កំពុង​ស្ថិត​នៅ​ប្រទេស​បារាំង​ ដែល​​កូន​ៗ​របស់​លោក​ ជឺលីភាគ​ច្រើន​ក្នុង​ចំណោម​កូន​ៗ​១២​នាក់​របស់​លោក​​រស់​នៅ​ទី​នោះ​ដែរ​។ លោក វណ្ណា​ បានថ្លែងថា​ លោក ជឺលី កំពុង​សម្រាក​ព្យាបាល​បញ្ហា​បេះ​ដូង​ និង​អាច​ត្រឡប់​មក​ប្រទេស​​កម្ពុជា​វិញ​ក្នុង​ពេល​ឆាប់​ៗខាង​មុខ​នេះ​។ ភរិយា​របស់​លោក ជឺលី គឺអ្នក​ស្រី​ សេងចន្តា អាយុ​៥០​ឆ្នាំ​ ត្រូវបាន​ចាប់​ខ្លួន​កាល​ពី​ខែកក្កដា ឆ្នាំ​២០១០ ពី​បទ​ជាប់​ពាក់​ព័ន្ធ​ក្នុង​ការ​រៀប​ចំ​​ផែន​ការធ្វើ​ឃាត​អ្នក​ស្រីសុថានិង​កូន​ស្រី​អាយុ៩ឆ្នាំ​ របស់​គាត់​។កាល​ពី​ថ្ងៃ​ទី​៧ខែ​តុលា តុលាការ​កំពូល​បាន​តម្កល់​សាល​ក្រម​​​ផ្តន្ទា​ទោស​អ្នក​ស្រី​ សេង ចន្ដា និង​អ្នក​​សម​គំនិត​បី​នាក់​ទៀត​ពី​បទ​រៀប​ចំ​ផែន​ការ​ធ្វើ​ឃាត​​ដែល​បរាជ័យ​នោះ​។ មិន​មាន​​ជន​សង្ស័យ​ណា​ម្នាក់​​ក្នុង​ចំណោម​ជន​សង្ស័យ​ទាំង​អស់​​ត្រូវ​បាន​គេ​ឃើញ​នៅ​ក្នុង​ផ្ទះ​របស់​លោកស៊ុន ចាន់ថុល នៅយប់​​មាន​ការ​ប៉ុន​ប៉ង​ធ្វើ​ឃាត​​នោះ​ទេ​ ហើយ​អ្នក​ស្រីសុថា និង​កូន​ស្រី​របស់​គាត់​ក៏​មិន​មាន​គ្រោះ​ថ្នាក់​អ្វី​ដែរ​។ យោង​តាម​គេហទំព័រ​របស់​ក្រុម​ហ៊ុន​លោក ផល្លាបុត្រ គឺ​ជា​ប្រធាន​ក្រុមហ៊ុន ខូវជឺលី​​ គ្រុបជា​ក្រុមហ៊ុន​រក​ស៊ី​រួម​គ្នា​​ជា​មួយ​​ក្រុម​ហ៊ុន​ខូវជឺលី​​អឹម​ខេខេ ​​ដែល​ជា​ក្រុម​ហ៊ុន​ធំ​មួយ​​ក្នុង​ចំណោម​ក្រុម​ហ៊ុន​សំណង់ធំៗ​នៅ​ប្រ​ទេស​កម្ពុជា​ដែល​​បាន​វិនិយោគ​យ៉ាង​ច្រើន​ទៅ​លើ​គម្រោង​ហេដ្ឋារចនា​សម្ព័ន្ធ​នៅ​ទូទាំង​ប្រទេស​។ក្រុមហ៊ុន​របស់​លោកក៏​បាន​វិនិយោគ​ផ្នែក​កសិកម្ម​ ស៊ីម៉ង់ត៍ ថ្នាំ​លាប និង​​ក្រុម​ហ៊ុន​មូលបត្រ​​ និង​សំណង់​អាង​ហែល​ទឹក​តាម​លំនៅ​ដ្ឋាន​ផង​ដែរ​។ លោក ជឺលី បាន​អះអាងជា​យូរ​មក​ហើយ​​​ថា ​ជម្លោះ​គ្រួសារ​របស់​លោក​បណ្តាល​មក​ពីការ​ដណ្តើម​មរតក​ក្នុង​ចំណោម​កូន​ៗ​​ និង​កូន​ប្រ​សារបស់​លោក​៕               ប្រែសម្រួល​ដោយឃិនណៃ

អ្នក​​​ជំនាញរបស់​​​ អ.ស.ប.៖ បុគ្គលិក​​​នៅ​​​ អ.វ.ត.ក. ​អាច​​​នឹង​​​បាត់​​​បង់​​​ការងារ

កាល​ពី​​​ថ្ងៃ​​​សុក្រ ​លោក ​ដេវីដ ​សេហ្វឺ​(David ​Scheffer) អ្នកជំនាញ​​​ពិសេស​​​របស់​​​អង្គ​​​ការ​​​​សហ​​​ប្រ​​​ជា​​​ជាតិ​​​ ហៅ​​​កាត់ អ.ស.ប. បាន​​​ជូន​​​ដំណឹង​​​​ដល់​​​​បុគ្គលិក​​​ជាតិ​​​ និង​​​អន្តរ​​​ជាតិនៅ​​​អង្គ​​​ជំនុំ​​​ជម្រះ​​​វិសាមញ្ញ​​​​ក្នុង​តុលាការ​​​កម្ពុជា ​ហៅ​កាត់ អ.វ.ត.ក. ថា ពួកគេ​​​ចាំ​​​បាច់​​​ត្រូវ​​​តែ​​​​រៀប​ចំ​ផែន​ការ​គ្រាអាសន្ន​​ដែល​អាច​កើត​មាន​ឡើង​​នៅ​ពេល​មិន​មាន​​​​​ការ​ផ្តល់​មូល​​​និធិ​សម្រាប់​​​បន្ត​​​ប្រតិបត្តិ​​​ការ​​​​​​​​ មាន​​​ន័យ​​​ថា ពួកគេ​​​អាច​​​នឹង​​​បាត់​​​បង់​​​ការ​​​ងារ។ លោក ដេវីដ  ​​​មាន​​​ប្រ​​​សាសន៍​​​ថា ​កិច្ច​​​​ប្រ​​​ជុំ​​​សម្ងាត់​​​ជា​​​មួយ​​​បុគ្គលិក​​​នៅ​​​សាលា​​​ក្តី​​​ខ្មែរ​​​ក្រហម​នេះ​​​មិនមែន​​​រៀប​​​ចំ​​​ឡើង​​​ក្នុង​​​គោល​​​បំណង​​​​ធ្វើ​ឲ្យ​មាន​ការ​ព្រួយ​បារម្ភ​នោះ​ទេ ប៉ុន្តែ​​​​ធ្វើ​​​​តាម​​​សំណើពី​​អង្គ​ភាព​​​ធន​​​ធាន​​​មនុស្ស​​​របស់​​​រដ្ឋអាមេរិក ​​​ពីព្រោះ​​​​​​នៅ​​ខ្វះ​​​ថវិកា​​​​ចំនួន​​​៣​​​លាន​​​​ដុល្លារ​​​សម្រាប់​​​ឲ្យ​សាលា​​​ក្តី​​ខ្មែរ​​​ក្រហម​​​​ដំណើរ​​​ការ​​​ឆ្លង​​​ផុត​​​ដំណាច់​​​ឆ្នាំ​​​នេះ។ លោក ដេវីដ សេហ្វឺ បាន​​​មាន​​​ប្រ​​​សា​​​សន៍​​​​បន្ថែម​​​ទៀត​​​ថា រូបលោកកំពុង​​​តែ​​​ខិត​​​ខំ​​​ខ្នះ​​​ខ្នែង​​​យ៉ាង​​​ខ្លាំង​​ដើម្បី​​​ធានាថា មិន​មាន​បុគ្គលិក​ណា​ម្នាក់​​បាត់​​​បង់​​​ការងារឡើយ។ លោក​​​ ដេវីដ សេហ្វឺ បាន​​​លើក​​​ឡើង​​​បន្ត​​​ថា “ នេះ​​​គឺ​​​ជា​​​កិច្ច​​​ប្រ​​​ជុំ​​​សម្ងាត់​​​ជា​​​មួយ​​​បុគ្គលិក​​​សាលា​​​ក្តី​​​ដើម្បី​​ក្រើន​​​រំឭក​​​ពួកគេពី​​​លទ្ធ​​​ភាព​​​នៃ​​​ការ​​​ជូន​​ដំណឹង​​​​​​ទាក់​​​ទិន​​​នឹង​​​កិច្ច​​សន្យា​​​របស់​​​ពួក​​​គេ។​​​យើង​​​តម្រូវ​​​ឲ្យ​​​ធ្វើ​​​បែប​​​នោះ​​​តាម​​​បទ​​​ប្បញ្ញត្តិ​​​របស់​​​អង្គ​​​ការ​​​សហ​​​ប្រជាជាតិ​​​ ដើម្បី​ឲ្យ​​បុគ្គលិក​ទាំង​អស់​បាន​ដឹង”។ លោក េដវីដ សេហ្វឺ បាន​​​​មាន​​​ប្រ​​​សាសន៍​​បន្ថែម​ទៀត​​​ថា “ ប្រសិន​​​បើ​​​មិន​​​ទទួល​​​បាន​​​មូល​​​និធិ​​​ទេ ពួកគេ​​​​​​ត្រូវ​​​ដឹង​​ឲ្យ​បាន​​​ឆាប់ៗ​​​តាម​​​ដែល​​​អាច​​​ធ្វើ​​​ទៅ​​​បាន​​​អំពី​​​យថា​​​ភាព។​​​ ពេល​​​នេះ​​​មិន​​​ទាន់​​​មាន​​​អ្វី​​​​កើត​​​ឡើង​​​ទេ។ នេះ​​​​​​គ្រាន់​​​ តែ​​​ជា​​​ការ​​​​​​បង្ហើប​​​ឲ្យ​ដឹង​​ជា​​​​​មុន​​ថា អាច​​​នឹង​មានការបាត់​បង់​ការ​ងារ​ ប្រសិន​​​បើ​​​មិន​​​ទទួល​​​បាន​​​មូល​​​និធិ​​​ទេ ​ហើយ​នៅ​ពេល​នោះ​ពួកគេ​​​​នឹង​​​ទទួល​បាន​​​ការ​​​ជូន​ដំណឹង​​​”។​​​​​​​​​​​​​​​​​​​​ កាល​​​ពីថ្ងៃ​​​សុក្រ ប្រភព​​​មួយ​​បាន​​​លើក​​​ឡើង​​​​ពីអា​​​រម្មណ៍​​​​​​រំជើប​​​រំជួលនៅ​​​ក្នុងទិដ្ឋភាពនៃ​​​កិច្ច​​​ប្រ​​​ជុំ​​​​នោះ​​​​​​ ហើយបានបន្ត​​​ថា បុគ្គលិក​​​សាលា​​ក្តី​​​ខ្មែរ​​​ក្រហម​​​ជា​​​ច្រើន​​​ដែល​​​បាន​​​ចូល​​​រួម​​ “ មិន​​​សប្បាយ​​​ចិត្ត​​​ទាល់​​​តែ​​​សោះ”។ លោក ដេវីដ សេហ្វឺ បានមាន​​​ប្រ​​​សាសន៍​​​​ទៀតថា លោក​​​បាន​​​ជំរុញ​​​លើក​​​ទឹក​​​ចិត្ត​​​បុគ្គ​លិក​​​នៅសាលា​​​ក្តី​​​ខ្មែរក្រហមឲ្យ​​​បន្ត​​ធ្វើ​​​ការ​​​ងារ​​​របស់​​​​ខ្លួន​​​ ហើយ​​​ថា លោក​​​កំពុង​​​តែ​​​ព្យាយាម​​​ធ្វើ​​​កិច្ច​​​ការ​​​គ្រប់​​​យ៉ាង ​​​ដើម្បី​​បញ្ចៀស​​​មិន​​​ឲ្យ​​​បុគ្គលិក​​​ណាម្នាក់​​​បាត់​​​បង់​​​ការ​​​ងារ​​​ឡើយ។ ក្រៅ​​​ពី​​​ចូល​​​រួម​​​កិច្ច​​​ប្រ​​​ជុំ​​​ជា​​​មួយ​​បុគ្គលិក​​​សា​​​លា​​​ក្តី​​​ លោក ដេវីដ សេហ្វឺ ក៏​​​បាន​​​ចំ​​​ណាយ​​​​ពេល​​​​មួយ​ថ្ងៃ​​​សុក្រ​​​ចូល​​​រួម​​​ក្នុង “ កិច្ច​​​ពិ​​​ភាក្សា​​​ដ៏​​​តាន​​​តឹង​​​” ជា​​​មួយ​​​​​​​តំណាង​​​មក​​​ពីស្ថាន​​​ទូត​​​បរទេស​​​មួយ​​​ចំនួន​​​ផងដែរ ក្នុង​​​កិច្ច​​​ខំ​​​ប្រឹង​​​ប្រែង​​​​ដើម្បីបំពេញ​​​ថវិកាដែលខ្វះ​​​ខាត​​​ចំនួន​​​៣លាន​​​ដុល្លារ​​សម្រាប់​ឆ្នាំ២០១២នេះ​។ លោក​​​ ដេវីដ សេហ្វឺ  បានមាន​​​ប្រ​​​សាសន៍​​​​ថា កិច្ច​​​ពិ​​​ភាក្សា​​​នេះ​​​​​បាន​​​បន្ត​​​រហូត​​​ដល់​​​ពេល​​​ល្ងាច​​​ ប៉ុន្តែបាន​​​ធ្វើ​​​ឲ្យ​​​លោក​ “ ​​​មានក្តី​​​សង្ឃឹម​​​ជា​​​ខ្លាំង​​​ថា យើង​​​នឹង​​​​​​អាច​​​ដោះ​​​ស្រាយ​​​បញ្ហា​​​នេះ​​​​​​បាន​​​សម្រាប់​​​​ឆ្នាំ​​​២០១២ ​​​​​​ដែល​​នៅ​​​ខ្វះ​​​ថវិកា​​​ចំនួន​​​​៣​​​លាន​​​ដុល្លារទៀត”។ លោក យ៉ូសុី អាបេ (Yoshi Abe) លេខា​ទី២​​​​ទទួល​​​បន្ទុក​​​ផ្នែក​​​ព័ត៌​​​មាន ​​​និង​​​វប្ប​​​ធម៌​​នៃ​​​​​​ស្ថាន​​ទូត​​​ជប៉ុន ​​​បាន​​​បញ្ជាក់​​​​ថា ​​​តំណាង​​​របស់​​​ប្រទេស​ជប៉ុនបាន​​​ជួប​​​ជា​​​មួយ​​​លោក​​​ ដេវីដ ​សេហ្វឺ  កាល​​​​ពី​​​ថ្ងៃ​​​សុក្រសប្តាហ៍នេះ។ ប្រទេស​​​ជប៉ុន ​​​គឺ​​​ជា​​​ម្ចាស់​​​ជំនួយ​​ធំ​​​បំផុត​​​​​​របស់​​​សាលា​​​ក្តី​​​ខ្មែរ​​​ក្រហម​​​ ពោល​​​គឺ​​​ប្រទេស​មួយនេះ​បាន​ផ្តល់​​​មូល​​​និធិ​​​ជិត​​​៧០​​​លាន​​​ដុល្លារ​​​រួច​ទៅ​​​​ហើយ​​​ដល់​​​សាលា​​​ក្តី​​​ខ្មែរ​​​ក្រហម គិត​​​មក​​​ទល់​​​នឹង​​​ខែ​​​មិថុនាឆ្នាំនេះ។ លោក តាតស៊ូយ៉ា ម៉ាជីដា (Tatsuya Machida) ទី​​​ប្រឹក្សា​​​នៅស្ថាន​​​ទូត​​​ជប៉ុន ប្រចាំ​​រាជធានីភ្នំពេញ បាន​សរសេរ​ក្នុង​​​អីុម៉េល​​​មួយថា “ កិច្ច​​​ប្រ​​​ជុំ​​​នៅ​​​ថ្ងៃ​​​នេះ​​​ មាន​​​ការ​​​ផ្លាស់​​​ប្តូរ​​​ទស្សន​​​គ្នា​​​ទៅ​​​វិញ​​​ទៅ​​​មក​​​អំពី​បញ្ហា​​នានា រួម​ទាំង​​​ដំណើរ​​​ការ​​​កាត់​​​ក្តី​​​​​​របស់​​​តុលាការ​នេះ​ និង​​​ស្ថាន​​​ភាព​​​ហិរញ្ញ​​​វត្ថុ​​​ដែល​សាលា​​​ក្តី​​​ខ្មែរ​​​ក្រហម​​​កំពុង​​​ប្រ​​​ឈម​​​ផង​​​ដែរ។​​​តែ​​​ទោះ​​​ជា​​​យ៉ាង​​​ណា ដោយ​​​សារ​តែ​​​​កិច្ច​​​ប្រ​​​ជុំ​​​នេះ​​​មាន​​​លក្ខណៈ​​​មិន​​ផ្លូវ​​​ការនោះ​ យើង​សុំ​​​មិន​​​ធ្វើ​​ការ​​​​អត្ថាធិប្បាយ​ទេ”។​​​​​​​​​ នេះ​​មិន​​​មែន​​​ជា​​​លើក​​​ទី​​១ទេ​​ដែល​​​សាលា​​​ក្តី​​​ខ្មែរ​​​ក្រហម​​​ ដែល​​​ពឹង​​​ផ្អែក​​​លើ​​​ជំនួយ​​​បរទេស​​​មាន​​​បញ្ហា​​​ហិរញ្ញ​​​វត្ថុ​​​ខ្លាំងនោះ​​​។​​​បុគ្គ​​លិក​​​ជាតិ​​​នៅ​​​សាលា​​​ក្តី​​​ខ្មែរ​​​ក្រ​​​ហម​​​មិន​​​ទាន់​​​ទទួល​​​បាន​​​ប្រាក់​​​ខែ​​​ចន្លោះ​​​ពី​​​ខែ​​​តុលា​​​ឆ្នាំ​​​២០១១ ​​ដល់ខែ​​​កុម្ភៈ​ ឆ្នាំ២០១២នេះទេ។ កាល​​​ពី​​​ថ្ងៃ​​​ពុធ លោក និលណុន ​​ប្រធាន​​​អង្គ​​​​​​ជំនុំជម្រះ​​​នៅ​​​សាលា​​​ក្តី​​​ខ្មែរ​​​ក្រហម បាន​​​ប្រ​​​កាស​​​ថា សវ​​​នា​​​ការ​​​នឹង​​​ត្រូវ​​​កាត់​​​បន្ថយ​​​មក​​​នៅ​​​ត្រឹម​​​បី​​​ថ្ងៃ​​​វិញ​​​ក្នុង​​​មួយ​​​សប្តាហ៍​​​ នៅពេល​​​ដំណើរ​​​​​​ការ​​​បន្ត​​​ឡើង​​​វិញ​​​នៅ​​​ថ្ងៃ​​​ទី​​​៥ខែ​​​វិច្ឆិកា​​​បន្ទាប់​​ពី​​​បាន​​​​ឈប់​សម្រាក​​​មួយ​​រយៈ​​​ពេល​​​ខ្លី។ លោកចៅក្រម និល ណុន បាន​មាន​ប្រសាសន៍​​បន្ថែម​ទៀតថា ការ​​​កាត់​​​បន្ថយ​​​ថ្ងៃ​​​ធ្វើ​​​ការ​​ មួយ​​​ផ្នែក​​​បណ្តាល​​​​មក​​ពី​​​ខ្វះ​​​មូល​​​និធិ។ លោក ដេវីដ សេហ្វឺ ​​​បានមានប្រ​​​សាសន៍​​​បន្ថែមទៀតថា ការ​​​គំរាម​​​កំហែង​​​បន្ទាន់​​​ចំពោះ​​​អនាគត​​​របស់​​​សាលា​​​ក្តី​​​ខ្មែរ​​​ក្រហម​​​ គឺ​​​ការ​​​​ធានា​ឲ្យ​ទទួលបាន​​​មូល​​​និធិ​​​សម្រាប់​​​ឆ្នាំ​​​​​​​ក្រោយ​ដើម្បី​​​ដក​​​ការ​​​ផ្អាក​​​ជួល​​​​បុគ្គលិក​​ដែល​​​បាន​​​អនុ​​​វត្ត​​​កាល​ពី​​​​ខែ​​​កក្កដា កន្លងមក។ លោក ដេវីដ សេហ្វឺ ​​​បានមាន​​​ប្រ​​​សាសន៍​​​ថា “ឧបសគ្គ​​​ពិត​​​ប្រា​​​កដ ​​​គឺ​​​ការ​ធ្វើ​​​ឲ្យ​​​ប្រាកដ​​​​​​ថា ខ្ញុំ​​​​​​រៃ​​​អង្គាស​​​​​​​​​​មូល​​​និធិ​បាន​គ្រប់​គ្រាន់​ពី​​​​រដ្ឋា​ភិ​បាល​​​​​​សម្រាប់​​​ឆ្នាំ២០១៣ ដើម្បី​អាច​ដក​ការ​​​ផ្អាក​​​ជួល​​​​បុគ្គលិក​​​​វិញ​​​បាន”។ លោក ដេវីដ សេហ្វឺ  ថែម​ទាំង​បាន​​​​លើក​​​ឡើង​​​ទៀតថា លោកមាន​ក្តី​​​សង្ឃឹម​​​ថា ​​​ការ​​​អំពា​​​វ​​​នាវ​​​សុំ​​​​​មូល​​​និធិដែល​​​ខ្វះ​​​ខាត​​​សម្រាប់​​​​​​ឆ្នាំ​​​២០១២​​ នឹង​​​មាន​​​អ្នក​​​​​​​ជួយ​​​បំពេញ ហើយបាន​អះអាង​ថា កត្តា​​​នោះ​​​នឹងអាច​ធានា​ឲ្យ​​ទទួល​​​បាន​​​មូល​​​និធិ​​​សម្រាប់​​​ឆ្នាំ​​​បន្ទាប់។ អ្នក​ជំនាញ​ពិសេស​របស់​អង្គការ​សហ​ប្រជា​ជាតិរូប​នេះ ​​​​ក៏​​​បាន​​​អំពាវ​​​នាវ​​​ឲ្យ​​​បុគ្គលិក​​​នៅ​​​សាលា​​​ក្តី​​​ខ្មែរ​​​ក្រហមស៊ូទ្រាំ និងរក្សាភាព​​​អត់​​​ធ្មត់​​​ផង​ដែរ។ លោក ដេវីដ សេហ្វឺ បានមាន​​​ប្រ​​​សាសន៍​​​បន្ត​​​ថា​​​ “ ខ្ញុំ​​​បាន​​​ស្នើ​​​សុំ​​​ឲ្យ​​​បុគ្គលិក​នៅ​សាលា​ក្តីខ្មែរក្រហម​ ​​​រក្សា​​​ភាព​​​អត់​​​ធ្មត់​​​ជា​​​មួយ​​​នឹងខ្ញុំ​​​ ទុក​​​ឲ្យ​​​ខ្ញុំ​​ជាអ្នកដោះ​​​ស្រាយ​​​បញ្ហា​​នេះ ​​​ខ្ញុំកំពុង​​​ខំ​​​ប្រឹង​ប្រែង​​​អស់​​​ពី​​​កម្លាំង​​​កាយ​​​ចិត្ត​​​ដើម្បី​​​ដោះ​​​ស្រាយឧបសគ្គ​​​នេះ ហើយ​​ខ្ញុំ​​​នឹង​​​ធ្វើ​​​ដំណើរ​​​តាម​​​ជើង​​​ហោះ​​​ហើរ​​​ពី​​​ទី​​​នេះ​​​ទៅ​​​កាន់​​​រដ្ឋធានី​នៃ​​​ប្រទេស​​​ផ្សេងៗដើម្បី​​​ជំរុញ​​​​ឲ្យ​មាន​ការ​ផ្តល់​មូល​និធិ”៕ ប្រែ​​​សម្រួល​​​ដោយ តែម សុខុម​​​​​​​​​                   ​​​​​​​​​​​​  

ឪពុក​​ម្តាយជន​រង​គ្រោះ​បារម្ភ​ខ្លាច​មាន​ការលាក់​បាំងនៅ​ក្នុង​​ឃាត​កម្ម​​​សម្លាប់​កូន​ស្រី​របស់​ខ្លួន​​

ស្រុក​អង្គស្នួល​, ខេត្ត​កណ្ដាល-​​ក្រោយ​ពេល​​​បញ្ចុះ​សព​​ លីម ស្រីពេជ្រ​ កាល​ពី​រសៀល​​ថ្ងៃ​សុក្រ ឪពុក​ម្ដាយ​របស់​នាង​បាន​អះអាង​ថាមាន​​​ការ​លាក់​បាំង​ការ​ពិត​នៅ​ក្នុង​ការ​ធ្វើ​ឃាត​កូន​ស្រីអាយុ​១៩​ឆ្នាំ​របស់​ខ្លួន​ ដែល​ត្រូវ​បាន​មនុស្ស​​ដែល​នាង​បាន​ជួប​តាម​ហ្វេស​ប៊ុក (Facebook)​យក​ខ្សែ​រឹត​ក​សម្លាប់​កាល​ពី​ថ្ងៃ​អង្គារ​។ នៅ​ក្នុង​ពិធី​បុណ្យ​សព​របស់​ជន​រង​គ្រោះ​ឈ្មោះ​ លីម ស្រីពេជ្រ ឪពុក​របស់​នាង​ឈ្មោះ ​លីម អៀង​ស ​និយាយ​ថា គាត់​មាន​ការ​ភ្ញាក់​​ផ្អើល​ដោយ​សារ​នគរ​បាល​​បាន​​សាក​សួរ​តែ​​មនុស្ស​ម្នាក់ ថ្វីបើ​មាន​មនុស្ស​បួន​នាក់​ត្រូវ​បាន​ចាប់​ខ្លួន​​ដោយ​សារ​សង្ស័យ​​ថា មាន​ការ​​ជាប់​ពាក់​ព័ន្ធ​ក្នុង​ការ​ចាប់​ជំរិត និង​សម្លាប់​នេះ​។ លោកអៀងសបាន​និយាយ​ថា “ ខ្ញុំ​​គិត​​ថាមាន​អ្នក​មាន​អំណាច​ និង​បុណ្យ​ស័ក្ដិ​ខ្ពស់​នៅ​ពី​ក្រោយ​ការ​ធ្វើឃាត​នេះ​”។ ​ដោយ​សារ​មាន​តែ​​ការ​ចាប់​ខ្លួន​ស្ត្រី​អាយុ​២៣​ឆ្នាំ​​ពី​បទ​ធ្វើ​ឃាត​នេះ​ ហើយ​​ជន​សង្ស័យ​បី​នាក់​ផ្សេង​ទៀត​ត្រូវ​បាន​ដោះ​លែង​ដោយ​គ្មាន​​ការ​បញ្ជាក់​ប្រាប់​ពី​​មូល​ហេតុ​​កាល​ពី​ថ្ងៃ​សុក្រ​នោះ លោក អៀងស បាន​និយាយ​ថាគាត់​សង្ស័យ​ថាមាន​ការ​លាក់​បាំង​។  គាត់​​​និយាយ​ថា “ ​គេ​បាន​រៀប​គម្រោង​​ចាប់​ខ្លួន​​ជន​សង្ស័យ​តែ​ម្នាក់​​ ដើម្បី​យក​ទៅ​ផ្តន្ទា​ទោស​តែ​ប៉ុណ្ណោះ​”។ ឪពុក​ម្ដាយ​ជន​រង​គ្រោះ​ លីម ស្រីពេជ្របាន​និយាយ​ថា ពួក​គាត់​ជឿជាក់​ថា មាន​មនុស្ស​​​​លើល​ពី​​ម្នាក់​ជាប់​ពាក់​ព័ន្ធ​នៅ​ក្នុង​រឿង​នេះ​ ហើយ​គាត់​បាន​​ជំរុញឲ្យ​នគរបាល​បន្ដ​ការ​ស៊ើប​អង្កេត​​របស់​ខ្លួន។ ជន​រង​គ្រោះលីមស្រីពេជ្រ​ ដែល​កាល​ពី​​ខែ​មុន​បាន​​ជាប់​ជា​កញ្ញា​ឯក ស្ប៉ាយ​វ៉ាញ​ឃូល័រ ​(Spy Wine Color) ត្រូវ​បាន​គេ​រក​ឃើញ​នៅ​ក្នុង​​ប្រឡាយ​មួយ​ក្នុង​ស្រុក​គង​ពិសី ខេត្ត​កំពង់​ស្ពឺ។ បន្ទាប់​ពី​គេ​បាន​រក​ឃើញ​សាក​សព​របស់​នាង​ នគរបាល​បាន​ធ្វើសន្និសីទ​កាសែត​មួយ​​កាល​ពី​ថ្ងៃ​ព្រហស្បតិ៍ ដែល​នៅ​ទី​នោះ​ពួក​គេ​​​បាន​លើក​ឡើង​ថា ឃាតករ​ដែល​សម្លាប់​ជន​រង​គ្រោះលីមស្រីពេជ្រគឺ​ជា​ស្ត្រី​អាយុ​២៣​ឆ្នាំ​ម្នាក់​ឈ្មោះ ស៊ុន គីមហេង ដែល​ជន​រង​គ្រោះ​បាន​ជួប​នៅ​​តាម​គេហទំព័រ​បណ្ដាញ​សង្គម​ហ្វេស​ប៊ុក​។ យោង​តាម​នគរបាល​បាន​ឲ្យ​ដឹង​ថា គេ​ជឿ​ជាក់​ថា ជន​សង្ស័យឈ្មោះគីមហេង មានគម្រោង​​លក់​សម្លៀក​បំពាក់​ ម​ួយ​​ជាមួយ លីម ស្រីពេជ្រ ហើយ​ពួក​គេ​បាន​​ណាត់​ជួប​គ្នា​ ដើម្បី​ពិភាក្សា​អំពី​ការ​​រក​សុីនេះ។ ​ប៉ុន្ដែអ្នក​ដែល​ លឹមស្រីពេជ្រ​ បាន​ជួប​កាល​ពី​ថ្ងៃ​អង្គារ​ មាន​ផែនការ​ផ្សេង​​ទៅ​វិញ។ យោង​តាម​នគរបាល​បង្ហាញ​ថា ពួក​គេ​មាន​​គម្រោង​សម្លាប់​​ លីមស្រីពេជ្រហើយ​បន្ទាប់​មក​ទូរស័ព្ទ​ទៅ​ឪពុក​ម្ដាយ​របស់​នាង​ ដើម្បី​ទារ​ប្រាក់​លោះ​​ប្រហែល​៥០.០០០​មឺុនដុល្លារ​។ លោក ជួន ណារិន ស្នង​ការ​រង​នគរបាល​រាជ​ធានី​ភ្នំពេញ​​ថ្លែង​ថា​ គីម​ហេង ដែល​គេ​សង្ស័យ​ថា ជា​ឃាតករ​ត្រូវ​បាន​សួរ​ចម្លើយ​នៅ​ឯសាលាដំបូង​រាជធានី​ភ្នំពេញ​ កាល​​ពី​ថ្ងៃ​សុក្រ ហើយ​និង​ត្រូវ​ឃុំ​ខ្លួន​បន្ដ​ ដើម្បី​រង​ចាំ​ការ​​ស​ម្រេច​ថា តើ​​ត្រូវ​​ចោទ​ប្រកាន់​ ឬក៏អត់។ យោង​តាម​លោកជួនណារិនបាន​ឲ្យ​ដឹង​ថាជន​សង្ស័យ​បី​នាក់​ផ្សេង​ទៀត​ដែល​ត្រូវ​បាន​ចាប់​ខ្លួ​នកាល​ពី​ថ្ងៃ​ព្រហស្បតិ៍​ នៅពេល​ក្រុម​នេះ​រួម​ទាំង​ជន​សង្ស័យ គីមហេង បាន​ទៅ​ទទួល​ប្រាក់​លោះ នៅឯ​ធនាគារ​មួយ​តាម​បណ្ដោយ​​មហាវិថី​ព្រះ​មុនីវង្ស​នោះ​ ត្រូវ​បាន​​ដោះ​លែង​​វិញ​ហើយ​។ ​លោក​ស្នង​ការ​រងរូប​នេះ​​បាន​ថ្លែង​ថា “ ​ជន​​សង្ស័យ​កំពុង​តែត្រូវ​បាន​សួរ​ចម្លើយ​នៅ​តុលាការ​ ​ប៉ុន្ដែមនុស្ស​បី​នាក់​ផ្សេង​ទៀតត្រូវ​បាន​អនុញ្ញាត​ឲ្យ​ទៅ​ផ្ទះ​របស់​ខ្លួន​វិញ​ ពី​ព្រោះ​ពួក​គេ​មិន​ជាប់​ពាក់​ព័ន្ធ​នឹង​ករណី​នេះ​ឡើយ។ អំឡុងពេល​នគរបាល​​កសាង​សំណុំ​រឿង​នៃការ​ធ្វើ​ឃាត​កាល​ពី​ម្សិលមិញ ជន​សង្ស័យ​ឈ្មោះ គីមហេង តែ​ម្នាក់​គត់បាន​​ធ្វើ​កាយ​វិការ​​ឡើង​វិញ​អំពី​របៀប​​នាង​​យក​ខ្សែ​រឹតក​សម្លាប់​ជន​រង​គ្រោះ​។​​ គីមហេង​  បាន​អះអាង​ថាជន​រង​គ្រោះ​ លីម ស្រីពេជ្រ មិន​ទាន់​ស្លាប់​ទេ​នៅ​ពេល​ដែល​ខ្លួន​យក​បង់​រុំមាត់​​ និង​ច្រមុះ​​ជន​រង​គ្រោះ​ដែល​​​សន្លប់​នោះ ​មុន​ពេល​អូស​ជន​រងគ្រោះ​ដាក់​ចូល​ក្នុង​ឃ្លុបរថយន្ដ​ ហើយ​បាន​ដឹក​ទៅ​ទម្លាក់​ចោល​ក្នុង​ប្រឡាយ​មួយក្នុង​ខេត្ត​កំពង់​ស្ពឺ។ នគរបាល​នៅ​មិនទាន់​​បង្ហាញ​ប្រាប់​អំពី របៀប​ដែល​ជន​សង្ស័យ​បាន​លើក​ជន​រង​គ្រោះ​​ដែល​សន្លប់​ដាក់​ចូល​ក្នុង​ឃ្លុប​រថយន្ដ​...

ជនរងគ្រោះ​ដោយ​​សារគ្រាប់មីន​និង​យុទ្ធភណ្ឌ​មិន​ទាន់ផ្ទុះ​​​ថយ​ចុះនៅ​ឆ្នាំ​នេះ ​ប៉ុន្តែ​​កា​រ​ស្លាប់​កើន​ឡើង

យោង​តា​ម​ទិន្នន័យ​ចុង​ក្រោ​យ​របស់​​រដ្ឋា​​​ភិ​បាលបានបង្ហាញ​ថា ​បើទោ​ះ​ជា​មា​ន​​​ការ​កើន​ឡើង​​​​​នូវ​កា​រ​ស្លាប់​​​ជន​ស៊ី​វិល​​​ដោ​យ​សារ​គ្រាប់​មី​ន​ប្រឆំាង​រថ​ក្រោះ​​ក៏​ដោយ ​ក៏​​ចំ​នួនអ្ន​ក​​ស្លាប់​និង​​រង​របួស​​​ដោយ​សារ​​គ្រាប់​មី​ន ​​​និង​យុទ្ធ​ភណ្ឌ​មិន​ទាន់​ផ្ទុះ​​​ពី​​ខែ​​មករា ​ដល់​ខែ​កញ្ញាបា​ន​​​ថយ​ចុ​ះតិច​តួច ​​បើ​ប្រៀប​ធៀបទៅ​នឹង​​ឆ្នាំ​មុន​។​​ យោង​តា​ម​​របាយ​កា​រណ៍ប្រចាំ​ខែ​ចុង​ក្រោយ​​​​ពី​​​អាជ្ញា​ធរ​កម្ចាត់​មីន​កម្ពុជា​​​ឲ្យ​ដឹង​ថាគ្រាប់​មីន​និង​យ​ុទ្ធ​ភណ្ឌ​មិន​ទាន់​ផ្ទុះ​​បាន​ធ្វើ​ឲ្យ​​មនុស្ស​ចំ​នួន​​១៤៣​នាក់​ស្លាប់​និង​​របួស​​​គិត​​​ត្រឹម​ថ្ងៃ​ទី​​៣០ខែ​​កញ្ញាបើ​ប្រៀប​ធៀប​​នឹង​​​ពេល​ដូ​​ចគ្នា​​ ក្នុង​ឆ្នាំ​២០១១មា​ន​​​មនុស្ស​​ចំ​នួន​​១៥១នាក់​បា​ន​ស្លាប់​ និង​របួស។ ទោះ​​​ជា​យ៉ា​ង​ណា​ មក​ទល់​ពេល​នេះ​​ក្នុង​ឆ្នាំ​នេះ​ចំ​នួ​ន​​មនុស្ស​ស្លាប់​បា​ន​កើន​ឡើង​ពី​​​​៣២នាក់កា​ល​ពី​ឆ្នាំ​មុន​ដល់​​​៣៧​នាក់​។នៅក្នុ​ង​​​​ចំ​ណោ​ម​នោះ​ មា​ន​​២០​​​​នាក់​ស្លាប់​​ដោ​យ​សារ​គ្រាប់​មី​ន​ប្រឆំា​ង​​រថ​ក្រោះហើយ​​នៅ​ឆ្នាំ​នេះ ​​​មាន​​ជន​រង​គ្រោះ​​​២០​នាក់​​ ប៉ុន្តែ​ បាត់​បង់​អវ​យ​​​វៈ​ និង​៨៦នាក់​​រង​របួ​ស​ស្រាល។ ​ជ​ន​រង​គ្រោ​ះ​​​តែជាង​ពាក់​កណ្តាល​​​ប៉ុណ្ណោះ​​​​ក្នុង​ឆ្នាំ​នេះបា​ន​ស្លាប់​ឬ​របួស​ដោ​យ​សារ​គ្រាប់មីន​​និ​ងយុទ្ធ​ភណ្ឌ​មិនទាន់​ផ្ទុះ​ ដូ​ចជា​​គ្រាប់​រ៉ុ​ក​កែតគ្រាប់​បែក​ទម្លាក់និង​គ្រាប់​បែ​ក​ដៃ។ទោះ​ជា​យ៉ា​ង​ណាគ្រោះ​ថ្នាក់​បណ្តាល​ឲ្យ​ស្លាប់​​នៅ​ក្នុ​ង​ខែ​​កញ្ញា​ គឺដោយ​សារ​​គ្រាប់​​មី​ន​ប្រឆំា​ង​រថ​ក្រោះ​​ ដែល​បា​ន​​ផ្ទុះ​នៅ​ក្នុង​ខេត្ត​បាត់​ដំ​បង​​ដោ​យ​សារ​បើក​គោយន្ត​កិននៅ​ពេល​មាន​ភ្លៀង​ជោកជាំ​ធ្វើ​ឲ្យ​ដី​ជ្រាយ​។ការ​​​​ផ្ទុះ​មួ​យ​​ករណី​នេះ​ បា​ន​សម្លាប់​មនុស្ស​​​ចំ​នួ​ន​៧នាក់​។ ចំ​នួន​អ្នក​ស្លាប់​​ និង​របួស​​ដោយ​សារ​​គ្រាប់​មី​ន​​​និង​យុទ្ធ​ភណ្ឌ​មិន​ទាន់​ផ្ទុះ​​សល់​ពី​កា​រ​​ទម្លាក់​គ្រាប់​បែ​ក​​​របស់​អា​មេរិ​ក​​អំឡុង​​សង្គ្រាម​​ឥណ្ឌូ​​ចិន​លើក​ទី​២ ​អំឡុង​របប​ខ្មែរ​ក្រហមនិ​ង​​បន្ទាប់​មក​គឺ​សង្គ្រាម​ស៊ី​វិល​នោះ​​ បាន​ធ្លាក់​ចុះ​យ៉ាង​ខ្លាំង​​ចាប់​តាំង​ពី​មាន​ការ​​ចាប់​ផ្តើម​កត់​ត្រា​ទុកឯក​សារ​ជាដំ​បូ​ង​​​ក្នុង​ឆ្នាំ​​១៩៧៩មក​។ចំ​នួ​ន​អ្នក​ស្លាប់​និង​រង​របួស​បា​ន​ធ្លាក់​​ចុះមក​ត្រឹម​ចំ​នួន​​​២១១​នាក់​​កា​ល​ពី​ឆ្នាំ​មុន​ ពី​ចំ​នួ​ន​​២៨៦នាក់​ក្នុង​ឆ្នាំ ​២០១០។ ទោះ​​ជា​យ៉ាង​ណាមី​ន​ប្រឆំាង​រថ​ក្រោះ​ដែ​លមា​ន​កម្លាំ​ង​ខ្លាំង​ជាង​​មី​ន​ប្រឆាំ​ង​​មនុស្ស​នោះ...

លោកនាយក​រដ្ឋ​មន្ត្រី ហ៊ុន សែន ​លើក​ឡើង​អំពី​​ព្រះ​បរម​សព​ព្រះ​មហា​​វី​រក្សត្រ នរោត្តម សីហនុ

​ចាប់​តាំ​​​ង​ពី​​កា​រ​​យាង​​ចូ​ល​ទិ​វង្គត​​របស់​អតី​ត​​ព្រះ​​មហា​ក្សត្រ​ នរោត្តមសី​ហនុ ​កា​ល​​ពី​ថ្ងៃ​ទី​១៥ ខែ​តុ​លាមក កាល​ពី​ម្សិល​មិញ​​លោក​នាយក​​​រដ្ឋ​មន្ត្រីហ៊ុនសែន ​បា​ន​​ថ្លែ​ង​​ជា​​​សា​ធារណៈ​លើក​ដំ​បូង​ថា លោក​សូមថ្លែង​​អំ​​ណរ​គុណ​​គណៈ​​ប្រតិ​ភូ​​អា​ស៊ាន​​​​របស់​លោក​​ចំ​ពោះ​​កា​រ​​ចូ​ល​រួ​ម​សម្តែ​ង​​មរណ​ទុក​្ខ​​របស់​​ខ្លួន​​ដល់​​កា​រ​យាង​ចូល​ទិវង្គត​​​របស់​សម្តេចឪ។ ​​នៅ​ក្នុ​ង​សុន្ទរក​ថាបើក​កិច្ច​ប្រជុំ​ក្រុ​ម​ប្រឹក្សា​​​សហ​គមន៍​​សង្គម​​​វប្ប​ធម៌​​អា​​ស៊ាន​​លើក​ទី​៨​ លោក​នា​​យក​រដ្ឋ​មន្ត្រី​ ហ៊ុនសែន ​បា​ន​គូស​បញ្ជាក់​​ថា ​ក​ិច្ច​ប្រជុំ​នេះ​ធ្វើ​​ឡើង​ចំ​ពេល​​​មាន​កា​រ​​​កាន់​ទុ​ក្ខ​​​ទូ​ទាំង​ប្រទេស​ចំ​ពោះ​​ព្រះ​បរម​សព​​ព្រះ​មហា​វី​រ​ក្សត្រនរោត្តម សីហនុ ដែ​ល​​យាង​​ចូ​ល​ទិវង្គត​​​ដោ​យ​សារ​​គាំ​​ង​បេះ​ដូង​​នៅ​ក្នុង​ទី​ក្រុ​ង​​ប៉េកាំ​ង។ មនុស្ស​ប្រ​ហែល​​១​លាន​នាក់​​តម្រង់​ជួ​រ​នៅ​តាម​ផ្លូវ​ក្នុង​រាជ​ធា​នី​ភ្នំ​ពេញ​ នៅ​ពេល​​​ព្រះ​​បរម​សព​របស់​សម្តេចឪ បា​ន​យា​ង​និ​វត្ត​ពី​ប្រទេ​ស​ចិន​​កា​ល​ពី​ថ្ងៃ​ទី​១៧ ខែ​​តុ​លា និង​ដង្ហែ​ទៅ​កាន់​ព្រះ​បរម​រាជ​វាំ​ង​ ហើយចាប់​តាំ​ង​ពី​ពេល​​នោះ​មកមា​ន​​ម​​នុស្ស​រា​ប់​មុឺន​នាក់​បា​ន​ទៅ​កាន់​ទុក្ខ​​នៅ​មុខ​ព្រះ​​​បរម​រាជ​វាំ​ង​។ ​កា​រ​ចូ​ល​រួ​ម​រំ​លែក​ទុក្ខ​នេះ​​ក៏​​មាន​មក​ពី​ទូ​ទាំ​ង​តំ​បន់​​ដែរ​ ហើយ​មន្ត្រី​អ្ន​ក​មុខ​អ្នក​កា​រ​​មួ​យ​​ចំ​នួន​​មក​ពី​បណ្តា​​ប្រទេ​ស​​អា​ស៊ាន ​​បា​ន​ធ្វើ​​ដំ​ណើរ​​​មក​កាន់​រាជ​ធានី​ភ្នំ​ពេញ​​ដើម្បី​​​គោ​រព​ព្រះ​​វិ​ញ្ញាណក្ខន្ធព្រះ​មហា​វី​រក្សត្រ​។​ ​លោកហ៊ុនសែ​នបា​ន​មា​ន​ប្រ​សាសន៍​ថា“ រាជ​​រដ្ឋា​ភិ​បាល​និង​ប្រជា​ពល​រដ្ឋ​កម្ពុជា​សូ​ម​ថ្លែ​ង​អំ​ណរគុណ​​​ដល់​ប្រទេ​ស​ជា​សមាជិក​​​ អា​​ស៊ាន​ទាំ​ង​អស់​ ដែល​បា​ន​​ចូ​ល​រួ​ម​កាន់​ទុ​ក្ខ​​ព្រះ​បរម​សព​​សម្តេចឪ ដែល​​រាជ​រដ្ឋា​​ភិ​បាល​និង​ប្រជា​ពល​រដ្ឋ​កម្ពុជា​មា​ន​ការ​​សោក​ស្តាយ​​និង​ក្រៀម​ក្រំ​យ៉ាង​ខ្លាំ​ង​”។ ​ក្នុង​​​សុ​ន្ទរក​​ថា​រយៈ​ពេល​កន្លះ​ម៉ោង​នេះ​លោក​នាយ​ករដ្ឋមន្ត្រី​​​​ ហ៊ុន សែន ក៏​បា​ន​លើក​ឡើង​អំ​ពី​បញ្ហា​សង្គម និង​វប្បធម៌​​​​នៅ​ទូ​ទាំ​ង​​តំ​​បន់ដែរ​៕ ប្រែសម្រួលដោយចេវប៊ុននី​

សា​លា​ឧទ្ធរណ៍បើក​ស​វ​នា​ការ​ជំនុំ​ជម្រះ​រឿងក្តី​មេ​​ដឹក​នាំ​ចលនា​ក្បាល​ខ្លា​​ ពី​បទ​ភេរវកម្ម​

កាល​ពី​ម្សិ​ល​មិញ​ សា​លា​ឧទ្ធរណ៍បាន​​ជំនុំ​ជម្រះ​សក្ខី​កម្ម​​របស់​ជន​សង្ស័យបួន​នាក់​ដែល​ត្រូវ​បាន​ចោទ​ប្រ​កាន់​ពី​បទ​​ភេ​រវ​កម្ម​​​ចំពោះ​ការ​ចូល​រួម​ក្នុង​ចល​នា​តស៊ូ​ដែល​មាន​ឈ្មោះ​​ថា​​ ចល​នា​ក្បាល​ខ្លា​​ ។ សាលា​ដំ​បូង​រាជ​ធា​នី​ភ្នំ​ពេញ​ បាន​​ផ្តន្ទា​ទោស​​លោក សោម ឯក​ មេ​​ដឹក​នាំ​ចល​នា​ក្បាល​ខ្លា​ឲ្យ​ជាប់​ពន្ធ​នា​គារ​រយៈ​ពេល​២៨​ឆ្នាំ​កាល​ខែ​តុ​លា ​ឆ្នាំ​២០១០​​ ចំពោះ​ការ​ដាក់​​​គ្រាប់​បែក​​នៅ​តាម​ទី​សា​ធា​រ​ណៈ​និង​បង្វឹក​ភេរវ​​ជន​ ក្រោយ​ពី​បាន​រក​ឃើញ​គ្រាប់​បែក​តូច​ៗនៅ​ជិត​ក្រ​សួង​ការ​ពារ​ជាតិ​ និង​​នៅជិត​​ស្ថាន​ីយទូរ​ទស្សន៍​ប៉ុស្តិ៍​លេខ​៣ ​​​ក្នុង​រាជ​ធា​នី​ភ្នំ​ពេញ​។ សមា​ជិក​ដទៃ​ទៀត​របស់​ចល​នា​ក្បាល​ខ្លា ​មាន​ ឈ្មោះ​ ឡឹក​ ប៊ុន​ហ៊ាន​ អា​យុ​៤៩​ឆ្នាំ​ឈ្មោះ​ ប៉ូក​ វណ្ណា​រ៉ា​ អាយុ​៥៧​ឆ្នាំ​ និង​ឈ្មោះ​ ជា​ គីម​យ៉ាន អាយុ​៤៥ឆ្នាំ​ ត្រូវ​បាន​សា​លា​ដំ​បូងរាជ​ធា​នី​ភ្នំ​ពេញ​​ផ្តន្ទា​ទោស​ឲ្យ​ជាប់​ពន្ធ​នា​​គារ​​ម្នាក់​ៗ​​រយៈ​ពេល​២០​ឆ្នាំ​​តាម​​បទ​ចោទ​ប្រ​កាន់​ដូច​គ្នា​​នេះ។ កាល​ពី​ម្សិល​មិញ​ លោកសោម​ ឯក​ អា​​យុ​៥១​ឆ្នាំ​បាន​ប្រ​កែក​​ម្តង​ហើយ​ម្តង​ទៀត​ថា​គាត់​មិន​បាន​ទទួល​ខុស​ត្រូវ​ចំពោះ​ការ​​ដាក់​​គ្រាប់​បែក​​ទាំង​នោះ​ទេ​ ប៉ុន្តែ​គាត់​បាន​ទទួល​ស្គាល់​ថា ​បាន​​បង្កើត​​ចល​នា​ត​ស៊ូ​​​នេះ​មែន។ លោកសោម​ ឯក​ បាន​និយាយ​ថា​ “ ខ្ញុំ​ពិត​ជា​បាន​បង្កើត​​ចល​នា​តស៊ូ​ក្បាល​ខ្លា​នេះ​មែន​ ប៉ុ​ន្តែ​ខ្ញុំ​សូម​បដិសេធ​ចំពោះ​ការ​​ដាក់​​គ្រាប់​បែក​ទាំង​នេះ​”។ ជន​សង្ស័យ​បី​នាក់​ផ្សេង​ទៀត ​​បដិ​សេធ​ថា​ ខ្លួន​មិន​បាន​ចូល​រួម​ក្នុង​ចល​នា​ក្បាល​ខ្លា​នោះ​ទេ​។តុលាការ​នឹង​ប្រ​កាស​សាល​ក្រម​នៅ​ថ្ងៃ​ទី​១៤​ខែ​វិ​ច្ឆិកា​។ កាល​ពី​ដើម​ខែ​នេះ​ សា​លា​ឧទ្ធរណ៍​បាន​​តម្កល់​​​សាល​ក្រម​​ផ្តន្ទា​ទោស​​លោក​​ សោម​​ ឯក​ នៅ​ក្នុង​រឿង​ក្តី​​ដោយ​ឡែក​​មួយ​ទៀត​ ដែល​​នៅ​ក្នុង​នោះ លោក​ត្រូវ​បាន​ផ្តន្ទា​​ទោស​ឲ្យ​ជាប់់​ពន្ធ​នា​គារ​រយៈ​ពេល​១៦​ឆ្នាំ​ពី​បទ​​រៀប​ចំ​​ផែន​ការ​​ដាក់​គ្រាប់​បែក​បំផ្ទុះ​​​ស្តូប​មិត្ត​ភាព​កម្ពុជា​វៀត​ណាម​ កាល​ពី​ឆ្នាំ​២០០៧​៕ ប្រែ​សម្រួល​ដោយ​ ថូ​ ណា​រឿន​​​​ ​​​​​​​​​​​

ចាប់​​​ជន​​​សង្ស័យ​​​​​​ជា​​​ឃាតករ​​សម្លាប់​​​ស្ត្រី​​​ម្នាក់ ដែល​ស្គាល់​តាម​​​ហ្វេស​​​ប៊ុក​​​​​​​

នគរ​​​បាល​​​​​​ប្រកាស​​​កាល​​​ពី​​​ម្សិលមិញ​​​ថា មនុស្ស​​​បួន​​​នាក់​​​ដែល​​​ត្រូវ​​​បាន​​​ចាប់​​​ខ្លួន​​​ពី​​​បទ​​​សង្ស័យ​​​ថា បាន​​​ចាប់​​​ជំរិត​​​ និង​​​ធ្វើ​​​ឃាត​​​យ៉ាង​​​ព្រៃផ្សៃ​​​កាល​​​ពី​​​ថ្ងៃ​​​អង្គារ​​​​​​លើ​​​ស្ត្រី​​​អាយុ​​​១៩​​​ឆ្នាំម្នាក់​​​ ដែល​​​មេខ្លោង​​​របស់​​​ក្រុម​​​នេះ​​​ បាន​​​ទាក់​​​ទង​​​លើក​​​ដំបូង​​​តាម​​​រយៈ​​​បណ្ដាញ​​​ទំនាក់​​​ទំនង​​​សង្គម​​​ហ្វេស​​​ប៊ុក (Facebook)។ នគរបាល​​​បាន​​​លើក​​​ឡើង​​​នៅ​​​ឯ​​​សន្និសីទ​​​កាសែត​​​កាល​​​ពីម្សិលមិញដើម្បី​​​ប្រកាស​​​ពីការ​​​ចាប់​​​ខ្លួន​ជន​ទាំង​នេះ​​​​​​​ថា ​​​ ជន​​​រង​​​គ្រោះ​​​ឈ្មោះ ​លីម ស្រីពេជ្រ ដែល​​​តាម​​​រយៈ​​​រូប​​​ថត​​​ជា​​​ច្រើន​​​​របស់​​​នាង​​​បាន​​​បង្ហាញ​​​ឲ្យ​​​ឃើញ​​​ថា ជា​​​ស្ត្រី​​​ម្នាក់​​​​មាន​​​រាង​​​ស្ដើង​​​ សាច់​​​ម៉ដ្ឋ​​​រលោង​​​ ដោយមាន​​​លាប​​​ថ្នាំ​​​សក់​​​ពណ៌ក្រហម និង​​​មាន​​​សម្លៀក​​​បំពាក់​​​ទាន់​​​សម័យ​​​ ​​​ជួប​​​​​ជន​​​សង្ស័យ​ឈ្មោះ ​ស៊ុន គីមហេង អាយុ​​​២៣​​​ឆ្នាំ​​​ តាម​​​រយៈ​​​ហ្វេស​ប៊ុក ​កាល​​​ពី​​​បីខែ​​​មុន​​​។ លោក ជួន ណារិន ស្នង​​​ការ​រង​​​នគរបាល​​​​​​​រាជ​​​ធានី​​​ភ្នំពេញ​​​ ​​​មាន​​​ប្រសាសន៍​​​ថា “ ​​​ជំហាន​​​ដំបូង​​​យើង​​​បាន​​​ចាប់​​​ខ្លួន​​​មេខ្លោង​​​ឈ្មោះ ​ស៊ុន ​គីមហេង ដែល​​​បាន​​​សម្លាប់​​​ជន​​រង​​​គ្រោះ​​​នៅ​​​ក្នុង​​​ផ្ទះ​​​ជួល​​​របស់​​​ខ្លួន​​​បន្ទាប់​​​ពី​​​បាន​​​ហៅ​ជន​​​រង​​​គ្រោះ​​​ដែល​​​ខ្លួន​​​​​​ស្គាល់​​​តាម​​​រយៈ​​​ហ្វេសប៊ុក ​ឲ្យ​ទៅ​​​ផ្ទះ​​​របស់​​​ខ្លួន​​”។លោក​​​បន្ដ​​​ថា អ្នក​​​​សម​គំនិត​​ចំនួន​​​បីនាក់​​​ផ្សេង​​​ទៀត​​​ត្រូវ​​​បាន​​​ចាប់​​​ខ្លួន​​​តាម​​​ក្រោយ​​​នៅ​​​ថ្ងៃ​​​ដដែល​​​។ លោក​​​បាន​​​ថ្លែង​​​ថា “ វា​​​ជា​​​លើក​​​ដំបូង​​​ហើយ​​​ដែល​​​យើង​​​បាន​​​ជួប​​​ប្រទះ​​​នឹង​​​ករណី​​​បែប​​​នេះ​​​ ដែល​​​ស្ត្រី​​​ជា​​​ឃាតករ​​​មាន​​​ទំនាក់​​​ទំនង​​​ជាមួយ​​​ជន​​​រង​​​គ្រោះ​​​តាម​​​រយៈ​​​ហ្វេស​ប៊ុកបន្ទាប់​​​មក​​​សម្លាប់​​​ជន​​​រង​​​គ្រោះ ហើយ​​​ជំរិត​​​​ទារ​​​ប្រាក់​​​ពី​​គ្រួសារ​​​របស់​​​នាង”។ លោក​​​ ជួន ណារិន បាន​​​មាន​​​ប្រសាសន៍​​​​ថា បន្ទាប់​​​ពី​​​មាន​​​ទំនាក់​​​ទំនង​​​តាម​​​​អុីនធើណិតជន​​​សង្ស័យ​​​ឈ្មោះ គីមហេង បាន​​​​ហៅ​ជន​​​រង​គ្រោះ លីម ស្រីពេជ្រ ដែល​​​ឪពុុក​​​ម្ដាយ​​​របស់​​​នាង​​​ជា​​​អ្នក​​​លក់​​រថយន្ដ​​​​​​​​ ឲ្យទៅ​​​ផ្ទះ​​​របស់​​​ខ្លួន ដើម្បី​​​ពិភាក្សា​​​អំពី​​​ការ​​​ចាប់​​​ផ្ដើម​​​ជំនួញ​​​លក់​​​សម្លៀក​​​បំពាក់​​​។ បន្ទាប់​​​ពី​​​បាន​​​ទៅ​​​​ដល់​​​ផ្ទះ​​​ជន​​​សង្ស័យ​​​ឈ្មោះ គីមហេង នៅ​​​ក្នុង​​​សង្កាត់​​​បឹង​​​ត្របែក​​​ ខណ្ឌ​​​ចំការ​​​មន កាល​​​ពី​​​រសៀល​​​ថ្ងៃ​អង្គារ ស្ត្រី​​​ជា​ជន​​​រ​ង​​​គ្រោះ​​​អាយុ​​​១៩​​​ឆ្នាំ​រូប​នេះ​បាន​​​អង្គុយ​​​មើល​​​ទូរទស្សន៍​​​នៅ​​​លើ​​​សាឡុង​​​នៅ​ក្នុង​​​បន្ទប់​​​ទទួល​​​ភ្ញៀវ​​​ ​​​ពេល​​​នោះ​​​ជន​សង្ស័យ​បាន​​​មក​​​ពី​​​ក្រោយ​​​ជន​​​រង​​​គ្រោះ ​ហើយ​បាន​​​​យក​​​ខ្សែ​​​រឹត​​​ក​​​នាងតែម្តង​។ ជន​​​រង​​​គ្រោះ លីម ស្រីពេជ្រ មិន​​​ទាន់​​​ស្លាប់​​​​​ទេ​​​ គឺ​​​គ្រាន់​​​តែ​​​សន្លប់​​​តែ​​​ប៉ុណ្ណោះ​​​ ហើយ​នៅ​​​ពេល​នោះជន​​​សង្ស័យ​ឈ្មោះ ​​​​​គីមហេង បាន​​​យក​​​បង់ស្អិត​រុំ​​​មាត់​​​របស់​​​នាង​​​ ហើយ​​​បន្ទាប់​​​មក​​​ដាក់​​​នាង​​​ចូល​​​ទៅ​​​ក្នុង​​​ឃ្លុប​រថយន្ត​​​ម៉ាក​​​តូយ៉ូតា​​​របស់​​​ខ្លួន​​​ និង​​​បាន​​​បើក​​​រថយន្ដ​​​ចេញ​​​ទៅឃុំ​​​អង្គពពែ ស្រុក​​​គង​​​ពិសី នៅ​ក្នុង​​​ខេត្ត​​​កំពង់​​​ស្ពឺ ​ជា​​​ទី​​​ដែល​​​ជន​​​សង្ស័យ​​​​​​បាន​​​ទម្លាក់​​​ជន​​​រង​​​គ្រោះ​​​​ចូល​​​ទៅ​​​ក្នុង​​​ប្រឡាយ​​​។ បន្ទាប់​​​មក​​​​ គីមហេង ​​​បាន​​​ត្រឡប់​​​មក​​​ផ្ទះ​​​វិញ ហើយ​​​បាន​​​ប្រើ​​​ទូរស័ព្ទ​​​ដៃ​​​របស់​​​ជន​​​រង​​​គ្រោះ​​​ លីម ស្រីពេជ្រ ដើម្បី​​​ទូរស័ព្ទ​​​ទៅ​​​កាន់​ឪពុក​​​ម្ដាយ​​​របស​់​​​នាង ដោយ​​​ប្រាប់​​​ថា ខ្លួន​​​បាន​​​ចាប់​​​ជំរិត​​​កូន​​​ស្រី​​​របស់​​​ពួក​​​គាត់​​​ហើយ​​​ ហើយ​​​​បាន​​​ទារ​​​ប្រាក់​​​លោះ​​​ចំនួន​​​៥០.០០០​​​ដុល្លារ​​​។ ​បន្ទាប់​​​ពី​​​ចរចា​​​ជាមួយ​​​នឹង​​​គ្រួសារ​​​ជន​​​រង​​​គ្រោះ​​​​ដែល​​​មិន​​​បាន​​​ដឹងថា កូនរបស់ខ្លួន​​​​​​ត្រូវ​​​បាន​​​សម្លាប់​​​ហើយ​​​នោះ ឈ្មោះ​​​ គីមហេង ​បាន​​​​បន្ថយ​ការ​​​ទាម​​​ទារ​​​របស់​​​ខ្លួន​​​មក​​​ត្រឹម ​១៦.០០០​​​ដុល្លារ។ លោក​​​ ជួន ណារិន បាន​​​ពន្យល់​​​​ប្រាប់​ថា ​នគរបាល​​​ដែល​​​ឪពុក​​​ម្ដាយ​​​ជន​​​រង​​​គ្រោះ​​​បាន​​​ទាក់​​​ទង បន្ទាប់​​​ពី​​​ឮ​​​ដំណឹង​​​ដំបូង​​​ពី​​​ជន​​​ចាប់​​​ជំរិត បាន​​​ផ្ដល់​​​ដំបូន្មាន​​​ដល់​​​គ្រួសារ​​​របស់​​​ជន​​​រង​​​គ្រោះ​​​ឲ្យ​​​ប្រាប់​​​​ឈ្មោះ​​​ គីមហេង ទៅ​​​យក​​​ប្រាក់​​​នៅ​​​​​​ធនាគារ ហើយ​​​ពេល​​​ជន​​​សង្ស័យ​ទៅ​​​យក​​​ប្រាក់​​​នគរបាល​​​បាន​​​រង​​់​ចាំចាប់​​​ខ្លួន​​​ស្ត្រី​រូប​នេះ​តែ​ម្តង។ លោក​​​ ជួន ណារិន បាន​​​មាន​ប្រសាសន៍​បន្ថែម​​​​ថា “ ជន​​​សង្ស័យ​​​ត្រូវ​​​បាន​​​ចាប់​​​ខ្លួន​​​បន្ទាប់​​​ពី​​​ជន​​​សង្ស័យ​​​បាន​​​បើក​​​រថយន្ដ​​​ទៅ​​​យក​​​ប្រាក់​​​លោះ​​​​ពី​​​ឪពុក​​​ម្ដាយ​​​របស់​​​ជន​​​រង​គ្រោះ​​​នៅ​​​ឯ​​​ធនាគារ​​​មួយ​​​ដែល​​​ស្ថិត​​​នៅតាម​​​​​បណ្ដោយ​​​មហាវិថី​​​ព្រះ​មុនីវង្ស។ បន្ទាប់​​​ពី​​​នគរបាល​​​បាន​​​សួរ​​​ចម្លើយ​​​រួច​​​​ឈ្មោះ គីមហេង​​​ បាន​​​សារភាពថា ខ្លួន​​​មិន​​​បាន​​​ធ្វើ​​​សកម្មភាព​​​នេះ​​​តែ​​​ម្នាក់​​​ឯង​​​នោះ​​​ទេ ​ហើយ​​​បាន​​​ប្រាប​់​​​នគរបាល​​​​ឲ្យ​​​​ស្វែង​​​រក​​​អ្នក​​​​រួម​គំនិត​​​​បីនាក់​​​ផ្សេង​​​ទៀត​​​ ដែល​​​មាន​​​ស្ត្រី​​​ម្នាក់​​​និង​​​បុរស​​​ពីរនាក់​​​ ដោយ​​​ក្នុង​​​នោះ ​​មាន​ម្នាក់​​​​ជា​​​មិត្ត​​​ប្រុស​​​របស​់​​​ គីមហេង។ នគរបាល​​​ បាន​​​ឃុំ​​​ខ្លួន​​​ជន​​​សង្ស័យ​​​បី​​​នាក់​​​ផ្សេង​​​ទៀត​​​នៅ​​​រសៀល​​​​ថ្ងៃ​​​នោះ ប៉ុន្ដែ​​​ កាល​​​ពី​​​ម្សិល​មិញ ​នគរ​បាល​​​មិន​​​បាន​​​ផ្ដល់​​​ព័ត៌មាន​​​លម្អិត​​​ថា ​​ពួក​គេ​​បាន​ចូល​រួម​​​ពាក់​​​ព័ន្ធ​​​នៅក្នុង​​​គម្រោង​​​ធ្វើ​​​ឃាត​​​នេះដោយ​វិធី​ណា​ឡើយ។ កាល​​​ពី​​​ម្សិលមិញ នគរបាល​​​បាន​​​ត្រឡប់​​​ទៅ​​​កាន់​​​កន្លែង​​​កើត​​​ហេតុ​​​វិញ​​​ជាមួយ​​​នឹង​​​ជន​​​សង្ស័យ​​​ គីមហេង ហើយ​​​បាន​​​ឲ្យ​​​ជន​​​សង្ស័យ​​​ធ្វើ​​​​សកម្ម​ភាព​​​ធ្វើ​​​ឃាត​​​​នោះ​ឡើង​វិញ។ ​ប្រព័ន្ធ​​​​ផ្សព្វផ្សាយ​​​ ក៏មាន​​​វត្តមាន​​​នៅ​​​កន្លែង​​​ធ្វើ​សកម្ម​ភាព​ឡើង​វិញ​នោះ​​​​ដែរ​​​ ហើយ​​​ខ្សែ​​​វីដេអូ​​​មួយ​​​ត្រូវ​​​បាន​​​បង្ហោះ​​​ភ្លាម​​​ៗ​​​នៅ​​​​តាម​អុីន​​​ធើណិត។ នៅ​​​ក្នុង​​​ខ្សែ​​​វីដេអូ​​​នោះ ​​​បាន​​​បង្ហាញ​​​ថា ​ជន​​​សង្ស័​​យ គីមហេង ដែល​​​នៅ​​​ក្នុង​​​បន្ទប់​​​ទទួលភ្ញៀវ​​​ដ៏​​​ស្អាត​​​មួយ បាន​​​មក​​​ពី​​​ក្រោយ​​ស្ត្រី​​​ម្នាក់​​​ដែល​​​ដើ​​រ​​​តួ​​​ជា​​​ជន​​​រងគ្រោះ​​​ លីម ​ស្រីពេជ្រ បាន​​​យក​​​ខ្សែរ​​​មក​​​​រឹត​ក​​​របស់​​​នាង​​​ ​​​រហូត​​ដល់​​​សន្លប់​​​នៅ​​​លើ​​​សាឡុងនោះ​​​។ ជន​​​សង្ស័យ គីមហេង និង​​​អ្នក​​​​រួម​គំនិត​​​​បីនាក់​​​ផ្សេង​​​ទៀត​​​ឥឡូវ​​​កំពុង​​​តែ​​​ឃុំ​​​ខ្លួន​​​នៅ​​​ឯ​ស្នង​​​ការ​ដ្ឋាន​​​​​នគរបាល​​​រាជ​​​ធានី​​​ ហើយនឹង​​​ត្រូវ​​​បញ្ជូន​​​ទៅ​​​កាន់​​​តុលាការ​​​​​​ ដើម្បី​​​ចោទ​​​ប្រកាន់​​​​នៅ​​​ថ្ងៃ​​​នេះ។ ការ​​​ធ្វើ​​​ឃាត​​​ដ៏​​​ព្រៃ​​​ផ្សៃ​​​លើ​​​ជន​​​រង​​​គ្រោះ​​​លីម ស្រីពេជ្រ​​​ គឺ​​​ជា​​​​​​ឃាតកម្ម​​​​ទាក់​ទង​នឹង​ហេ្វស​ប៊ុក​លើក​ដំបូង​​ ដែល​មិន​ធ្លាប់​មាន​នៅ​ក្នុង​ប្រទេស​កម្ពុជា​​​។ កាល​​​ពី​​​ខែ​​​កក្កដា ស្ត្រី​​​ជន​​​ជាតិ​​​នីហ្សេរីយ៉ា ​អាយុ​​​២៤​​​ឆ្នាំ​​​ម្នាក់​​​ឈ្មោះ​​​ ស៊ីនធីយ៉ា ​អូសូកូហ្គូ ​(Cynthia Osokogu) ត្រូវ​​​មនុស្ស​​​ដែល​​​នាង​​​ធ្លាប់​​​ស្គាល​់​​​តាម​​​ហ្វេស​​​ប៊ុក​​​​​​ចាប់​​​ជំរិ​ត​​​ ហើយ​​​សម្លាប់​​​នៅ​​​ក្នុង​​​សណ្ឋាគារ​​​ឡាហ្គូស ​(Lagos) ដោយ​​​​ធ្វើ​​​ឲ្យ​​​មាន​​​ការ​​​ចុះផ្សាយ​​​ជាច្រើន​​​នៅ​​​ក្នុង​​​ប្រព័ន្ធ​​​ផ្សព្វ​​​ផ្សាយ​​​នីហ្សេរីយ៉ា ពាក់ព័ន្ធនឹង​​​​​​គ្រោះ​​​ថ្នាក់​​​ដែល​​​បង្កឡើង​​​ដោយ​​​គេហទំព័រ​​​បណ្ដាញ​​​ទំនាក់​​​ទំនង​​​សង្គម​​​៕ ប្រែសម្រួល​​​ដោយ ស៊ា ស៊ុយឈាង

យុវជន​​​គណបក្ស​​​ សម ​រង្ស៊ី ​គ្រោង​​​ធ្វើការ​​​តវ៉ា ឲ្យ​​​មាន​​​ការ​​​ដោះ​​​លែង​​​ទណ្ឌិត​​​នយោ​​​បាយ​​​

​​​ចលនា​​​យុវជន​​​គណបក្ស​​​ សម រង្ស៊ី គ្រោង​​​នឹង​​​ធ្វើ​​​ការ​​​តវ៉ា​​​នៅ​​​​សួន​សេរី​​​ភាព​​​ ក្នុង​​​​រាជធានី​​​ភ្នំពេញ​​​ នៅ​​​ថ្ងៃទី​​​៩​​​ខែ​​​វិច្ឆកា​ដែល​ជា​​​​ថ្ងៃ​​​បុណ្យ​​​ឯករាជ្យ​ ដើម្បី​​​អំពាវ​​​នាវ​​​ឲ្យ​​​មាន​​​ការ​​​ដោះ​​​លែង​​​​ទណ្ឌិត​​​នយោ​​​បាយ​​​​​​ទាំង​​​អស់​​​​​។​​​ យោង​​​តាមលោក សួង សោភ័ណ មេដឹក​​​នាំ​​​ចលនា​​​យុវជន​​​គណបក្ស​​​ សម រង្ស៊ី បាន​​​ឲ្យ​​​ដឹង​​​​​​ថា ក្រុម​​​អ្នក​​​តវ៉ា ដែល​​​គេ​​​រំពឹង​​​ថា នឹង​​​មាន​​​​​​ចំនួន​​​១.០០០​​​នាក់នោះ​​​​​​ នឹង​​​ដាក់​​​​​​ញត្តិ​​ទៅ​​​​​​​ព្រះ​​​បរម​​​រាជវាំង​​​ស្នើ​​​សុំ​​​ឲ្យ​​​ព្រះ​​​មហា​​​ក្សត្រ ​នរោត្តមសី​​​ហមុនី ប្រ​​​ទាន​​​ការ​​​លើក​​​លែង​​​ទោស​​​ដល់​​​ទណ្ឌិតនយោ​​​បាយ​​​ទាំង​​​អស់​​​។ ពួកគេ​​​នឹង​​​​​​ដាក់​​​ញត្តិ​ចម្លង​​​មួយ​​​ច្បាប់ៗ​​​ទៅក្រសួ​​​​​​ង​​​យុត្តិ​​​ធម៌រដ្ឋ​​​សភា និង​​​ក្រសួង​​​មហាផ្ទៃផង​​​ដែរ។ លោក សោភ័ណ ​​​លើក​​​ឡើង​​​​​​ថា ​ “ យើង​​​នឹង​​ទាម​​​ទារ​​​ឲ្យ​​​មាន​​​ការ​​​ដោះ​​​លែង​​​ទណ្ឌិត​​​នយោ​បាយ​​​ទាំង​​​អស់ និង​​​ ​​​អ្នក​​​ការ​​​ពារ​​​សិទ្ធិ​​​មនុស្ស​​​ដែល​​​បាន​​​ប្រឈម​​​នឹង​​​ការ​​​ចោទ​​​ប្រកាន់​​​​បទ​​​ព្រហ្មទណ្ឌ​​​ ព្រោះ​ការ​​​សម្រេច​​​របស់​​​តុលា​ការ​​​​  ត្រូវ​​​បាន​​​ធ្វើ​​​ឡើង​​​ក្រោម​​​ឥទ្ធិពល​​​របស់​​​គណបក្ស​​​កាន់​​​អំណាច”។ ញត្តិ​​​នេះ​​​នឹង​​​ស្នើ​​​សុំ​​​ដោយ​ត្រង់​ៗ​​​ឲ្យ​​​មាន​​​​​​ព្រះ​​​រាជទាន​លើក​លែង​​​​ទោស​​​​​ដល់​​​លោក ​សមរង្ស៊ី មេដឹក​​​នាំ​​​គណបក្ស​​​ សម រង្ស៊ី ដែល​​​កំពុង​​​រស់​​​នៅ​​​ដោយ​​​​ការ​និរទេស​ខ្លួន​ឯង​នៅ​ក្នុង​​​ប្រទេស​​​បារាំង​​​ តាំង​​​ពី​​​ឆ្នាំ​​​២០០៩​​​មក ដេើម្បី​​​គេចវេះពី​​​​ទោស​​​ជាប់​​​ពន្ធ​នាគារ​​​រយៈពេល​​​១១ឆ្នាំ​​​ពីបទ​​​ញុះ​​​ញង់ បរិហារកេរ្តិ៍ និង​​​បំផ្លាញ​​​ទ្រព្យ​​​សម្បត្តិ​​​សាធារណៈ​​​ ។ កាល​​​ពីសប្ដាហ៍មុន លោក សម រង្ស៊ី បាន​​​ផ្ញើ​​​លិខិត​​​មួយ​​​ច្បាប់​​​ទៅ​​​ទី​​​ស្ដី​​​ការ​​​គណៈ​​​រដ្ឋ​​​មន្ត្រី និង​​​ខុទ្ទកាល័យ​​​ព្រះ​​​មហាក្សត្រ ​នរោត្តម​សីហមុនី ស្នើ​​​សុំ​​​ឲ្យ​​​មាន​​​ការ​​​អនុញ្ញាត​​​ឲ្យ​​​​​​លោក​​​អាច​​​ត្រឡប់​​​មក​​​កម្ពុជា ដើម្បី​​​​គោរព​​​​​​ព្រះ​​​វិញ្ញាណ​​​ក្ខន្ធ សម្ដេចឪ​​​ នរោត្តម សីហនុ។ នៅ​​​សប្ដាហ៍នេះ ព្រះ​​​អង្គ​​​ម្ចាស់ ​ស៊ីសុវត្ថិ ​ធម្មិកោ ប្រធាន​​​ខុទ្ទកាល័យ​​​ព្រះមហាវីរក្សត្រ​នរោត្តម សីហនុ ​បាន​​​មាន​​​បន្ទូល​​​ប្រាប់​​​ប្រព័ន្ធ​​​ផ្សព្វ​​​ផ្សាយ​​​ថា ដោយ​សារ​ព្រះ​​​មហា​​​ក្សត្រ​​​នរោត្តម សីហមុនី មិន​​​អាច​​​អន្ដរាគមន៍បាន​​​រដ្ឋា​​​ភិបាល​​​គួរតែ​​​លើក​​​លែង​​​ទោសទណ្ឌិត​​​នយោបាយ​​​ទាំង​​​អស់​​​ ដើម្បី​​​​បង្ហាញ​ពី​​​ការ​​​គោរព​​​ចំពោះ​​​អតី​​​តព្រះ​​​មហា​​​ក្សត្រ។ នៅ​​​ក្នុង​​​បញ្ជី​​​របស់​​​ចលនា​​​យុវជន​​​នេះ​​​ដែរ ក៏​​​មាន​​​ឈ្មោះ​​​លោក ម៉ម សូណង់​​​ដូ ម្ចាស់​​​ស្ថានីយវិទ្យុ​​​ឯករាជ្យ ដែល​​​ត្រូវ​​​បាន​​​ផ្ដន្ទា​ទោស​​​​​ឲ្យ​​​ជាប់​​​ពន្ធ​​​នាគារ​​​រយៈពេល​​​២០​​​ឆ្នាំ​​​ពី​​​បទ​​​ដឹក​​​នាំ​​​ចលនា​​​អប​​​គមន៍​​​កាល​​​ពី​​​ដើម​​​ឆ្នាំ​​​នេះ និង​​​សកម្មជន​សហគមន៍​​​បុរី​​​កីឡា និង​​​បឹង​​​កក់។​​​​​​​​​ លោក គុយ ប៊ុនសន អគ្គនាយក​​​នៃ​​​អគ្គ​​​នាយក​​​ដ្ឋាន​​​ពន្ធ​​​នាគារ​​​នៃ​​​ក្រសួង​​​មហា​​​ផ្ទៃ​​​បាន​​​បដិសេធថា គ្មាន​​​នរណាម្នាក់​​​នៅ​ក្នុង​​​ចំណោម​​​ទណ្ឌិត​​​​​​កម្ពុជា​​​ជាង​​​១.០០០​​​នាក់​​​នោះ​​​ជា​​​ទណ្ឌិត​​​នយោ​​​បាយ​​​នោះទេ។ លោក ប៊ុនសន​​​​​​​​​​​​ បាន​​​មាន​​​​​​​​​ប្រសាសន៍​​​ថា “ អ្នក​​​ដែល​​​កំពុង​​​ជាប់​​​ពន្ធ​​​នាគារ​​​ទាំង​​​​​​នោះ​​​ ​​​ដូច​​​ជា​​​លោក​​​ ម៉ម ​សូណង់​​​ដូ​​​ ជាដើម ​ជាប់​​​ពន្ធ​​​នាគារ​​​ដោយ​​​សារ​តែគាត់​​​ជាប់​​​ពាក់​​​ព័ន្ធ​​​នឹង​​​ចលនា​​​អបគមន៍​ ចំណែក​​​ លោក សម រង្ស៊ី ក៏​​​បាន​​​ប្រព្រឹត្ត​​​បទ​​​​ល្មើស​ដែរ”។ លោកបាន​បន្ដ​​​ថា“ គ្មាន​​​ទណ្ឌិត​​​នយោ​បាយ​​​ណា​ម្នាក់​​​​​​ជាប់​​​ពន្ធ​​​នាគារនៅ​​​​ក្នុង​​​ប្រទេស​​​​កម្ពុជា​​​នោះ​​​ទេ ពួកគេ​​​ទាំង​​​អស់​​​ត្រូវ​​​បាន​​​តាម​​​​ក្រម​​ព្រហ្ម​ទណ្ឌ”៕ ប្រែ​​​សម្រួល​​​ដោយ ហម សុផាណ្ណា​​​