ឱកាស​សម្រាប់​បេក្ខជន​តំណាង​រាស្ត្រ​​​​​របស់​​​គណ​​​បក្ស​ប្រជា​ជន​រលាយ​បាត់​ក្រោយ​ការ​បោះឆ្នោត​

ដោយ​សារ​លទ្ធផល​បឋម​​​​នៃ​​​ការ​​​បោះ ឆ្នោត​​​​​​ជាតិ​​​បង្ហាញ​ថា​​​ ​​​​​គណបក្ស​ប្រជា​ជន​កម្ពុជា​​​​នឹង​​បាត់​បង់​​​អាសនៈ​​​សភា​យ៉ាង​តិច​២២​​នោះ​ ផែន​ការ​របស់​​​គណបក្ស​​​​កំពុង​​​កាន់​​​អំណាច​​​នេះ​​​​​​ក្នុងការ​​​ដាក់​បញ្ចូល​សមាជិក​សភា​​​ជំនាន់​ថ្មី​ ដែល​​​សុទ្ធតែ​​​ជា​​​កូន​ៗ​របស់ថ្នាក់​​​ដឹកនាំ​​​បក្ស​​​​ កំពុង​​​ស្ថិត​នៅ​ក្នុង​ក្តី​​​មន្ទិល​​​​។ កូន​ប្រុស​របស់​លោក​នាយក​រដ្ឋ​មន្ត្រី​ ហ៊ុន សែន លោក​ឧបនាយក​រដ្ឋ​មន្ត្រី​ សុខ អាន និង​​លោក​​​ ស ខេង រដ្ឋ​មន្ត្រី​ក្រសួង​មហាផ្ទៃ  សុទ្ធ​​​តែ​​​​ស្ថិត​​​នៅ​​​​​​ក្នុង​​​លេខ​រៀង​ក្រោម​​​គេ​​​ពេក​​​មិន​អាច​​​​ទទួល​បាន​អាសនៈ​​ដោយ​ស្វ័យ​ប្រវត្តិ​​​​ទេ​​​ ប្រសិន​បើ​លទ្ធផល​​​បឋម​​​នៃ​​​​ការ​បោះ​ឆ្នោត​កាល​ពី​ថ្ងៃ​អាទិត្យ​​គឺ​​​ជា​​​លទ្ធផល​​​ត្រឹមត្រូវ​​​នោះ​​​​​។ ​គណបក្ស​ប្រជាជន​កម្ពុជា​មាន​ឱកាស​កែ​ប្រែ​បញ្ជី​ឈ្មោះ​​​បេក្ខជន​​​តំណាង​​​រាស្ត្រ​​​​របស់​ខ្លួន​ក៏ពិតមែន​​​​ ប៉ុន្តែ​​​​​​អាសនៈ​ទាំង​​​​៦៨​ដែល​គណបក្ស​​​នេះ​​ព្យាករ​​​ថា​​​ នឹង​​​ទទួល​​​បាន​​​ពី​​​ការ​​​បោះឆ្នោត​​​​កាល​ពី​ថ្ងៃ​អាទិត្យ​នេះ​គឺ​​​មិន​​​គ្រប់​គ្រាន់​​​សម្រាប់​​​សមាជិក​សភា​​​បច្ចុប្បន្ន​​​របស់​​​​គណបក្ស​​​​​​នេះ​​​ទាំង​​​​៩០​រូប​​​​ទេ​​​។ លោក ហ៊ុន ម៉ានី ដែល​​​ត្រូវ​ជា​កូន​ប្រុស​ពៅ​របស់​លោក ហ៊ុន សែន និង​​​ជា​​​មេ​ដឹក​នាំ​​ចលនា​យុវជន​របស់​គណបក្ស​ប្រជា​ជន​កម្ពុជា​គឺ​ជា​បេក្ខជន​​​​​​​​តំណាង​​​រាស្ត្រ​​​មណ្ឌល​កំពង់​ស្ពឺ​ ប៉ុន្តែ​​​ លោក​​​ស្ថិត​នៅ​លេខ​រៀង​ទី​៤​ឯ​ណោះ​​​​​​​​លើ​បញ្ជី​​​​​​​​​ឈ្មោះ​​​​​​បេក្ខជន​​​របស់​​​​គណបក្ស​​​​នេះ​​​សម្រាប់​​​​មណ្ឌល​​​​នេះ​។ ចំនួន​អាសនៈ​របស់​គណបក្ស​ប្រជា​ជន​កម្ពុជា​ប្រចាំ​មណ្ឌល​កំពង់​ស្ពឺ​​​ បាន​ធ្លាក់​​​ចុះ​ពី​ប្រាំ​អាសនៈ​ក្នុង​ឆ្នាំ​២០០៨​មក​ត្រឹម​​​បី​អាសនៈ​​​ក្រោយ​​​ការ​​​បោះឆ្នោត​​​​កាល​​ពី​ថ្ងៃ​អាទិត្យ​ នេះ​បើ​យោង​តាម​លទ្ធផល​​បឋម​របស់​គណបក្ស​​​នេះ​​​ផ្ទាល់​​​​ មាន​ន័យ​ថា លោក ហ៊ុន​ ម៉ានី មិន​​​អាច​​​​ទទួលបាន​​​អាសនៈ​​​​​សភា​ដោយ​​​​ស្វ័យ​ប្រវត្តិ​​​​​ឡើយ​​​។ បេក្ខ​ជន​​កំពូល​ៗ​ទាំង​​​បីរូប​របស់​គណ​បក្ស​​​កាន់​អំណាច​ក្នុង​ខេត្ត​នេះ​​​រួមមាន​​​ លោក​ សាយ ​ឈុំ ប្រធាន​ស្ដី​ទី​ព្រឹទ្ធសភា​ និង​ជា​ប្រធាន​គណៈ​​កម្មាធិការ​អចិន្ត្រៃយ៍​នៃ​​​គណបក្ស​ប្រជា​ជន​កម្ពុជា​​​ លោក...

ក្រុមអ្នក​សង្កេតការណ៍​អន្តរ​ជាតិ​​ប្រកាស​ថា ការ​បោះ​ឆ្នោត​ជាតិប្រព្រឹត្តទៅ​ដោយ​សេរី និង​យុត្តិធម៌

អ្នក​សង្កេតការណ៍​អន្តរ​ជាតិ​២៩១​នាក់ ដែល​គណៈ​កម្មាធិការ​ជាតិ​រៀប​ចំ​ការ​បោះ​ឆ្នោត​ បាន​អញ្ជើញ​ឲ្យ​មក​ត្រួត​ពិនិត្យ​សកម្ម​ភាព​បោះ​ឆ្នោត​កាលពី​ថ្ងៃ​អាទិត្យ បាន​ប្រកាស​ថា ការ​បោះ​ឆ្នោត​ជាតិ​អាណត្តិ​នេះ​បាន​ប្រព្រឹត្ត​ទៅ​ដោយ​សេរី និង​យុត្តិធម៌ ទោះ​បីជា​មាន​ការ​​ចោទ​ប្រកាន់​ថា ភាព​មិន​ប្រក្រតី​កើត​ឡើង​គួរ​ឲ្យ​កត់​សម្គាល់​ក៏​ដោយ។ ទោះ​បី​ជា​គណ​បក្ស​សង្គ្រោះ​ជាតិទទួល​បាន​សំឡេង​គាំ​ទ្រ​ច្រើនគួរ​ឲ្យ​កត់​សម្គាល់ ពោល​គឺ​ទទួល​បាន​៥៥​អាសនៈ​ក្នុង​ចំណោម​១២៣​អាសនៈ​នៅ​រដ្ឋ​សភាក៏ដោយ​ ក៏គណ​បក្ស​ប្រជា​ជន​កម្ពុជា​ទទួល​បាន​៦៨​អាសនៈ​ ដែល​ជា​សំឡេង​ភាគ​ច្រើន​ដែរ។ ក្រុម​អ្នក​សង្កេត​ការណ៍​ដែល​តាម​សេចក្តី​រាយ​ការណ៍​ថា ទទួល​បាន​ការ​រ៉ាប់​រង​លើ​ការ​ចំណាយ​ផ្សេងៗ​ពី​គណ​​បក្សកាន់​អំណាច​នោះ បាន​លើក​​ឡើង​ថា ​គណ​បក្ស​ទាំង​អស់​គួរ​តែ​គោរព​ និង​ទទួល​យក​​សំឡេង​ភាគ​ច្រើន​នេះ​។ សេចក្តី​ថ្លែង​ការណ៍​រួម​របស់​សន្និសីទ្ធ​អន្តរ​ជាតិ​ស្តី​ពី​គណ​បក្ស​នយោ​បាយ​អាស៊ី​ (ICCAP) និង​អង្គការ​ទស្សននយោ​បាយ​អ្នក​ប្រជា​ធិប​តេយ្យ​​​អាស៊ី​ប៉ាស៊ីហ្វិក​អន្តរជាតិ​ (CAPDI) មាន​ខ្លឹម​សារ​ថា“​ យើង​យល់​ឃើញ​ថា ការ​បោះ​ឆ្នោត​នៅ​ក្នុង​​ប្រទេស​កម្ពុជា​ទទួល​បាន​ជោគ​ជ័យ​ ដែល​កើត​ចេញ​ពី​ឆន្ទៈ​ដ៏​រឹង​មាំ និង​ជា​ជ័យជម្នះ​របស់​ប្រជា​ជន​កម្ពុជា​នៅក្នុង​ដំណើរ​ឆ្ពោះ​ទៅ​កាន់​អនាគតកាន់​តែ​ប្រសើរ​ ​ដោយ​ផ្អែក​លើ​ភាព​ឧដុង្គ​ឧត្តម និង​ខ្ពង់​ខ្ពស់​នៃ​ការ​បោះ​ឆ្នោត​”។ ស្ថាប័ន​ទាំង​ពីរ​បាន​អះ​អាង​ថា ខ្លួន​តំណាង​​ឲ្យ​គណ​បក្ស​នយោ​បាយ​៣៤០គណ​បក្ស​មក​ពី​បណ្តា​ប្រទេស​ក្នុង​តំបន់​អាស៊ី​ ដូចជា ប្រទេស​ភូមា ឥណ្ឌូណេស៊ី និង​ប្រទេស​ម៉ាឡេស៊ី​ ជា​ដើម​។ សេចក្តី​ថ្លែង​ការណ៍​ដែល​ត្រូវ​បាន​ផ្សព្វ​​ផ្សាយ​តាម​រយៈ​គេហ​ទំព័រ​របស់​គណៈ​កម្មា​ធិការ​ជាតិ​រៀប​ចំ​ការ​បោះ​ឆ្នោត​ផង​ដែរ​នោះ​បាន​ចាត់​ទុក​ការ​​ថា ការ​បោះ​ឆ្នោត​កាល​ពី​ថ្ងៃ​អាទិត្យប្រ​ព្រឹត្ត​ទៅដោយ “ ​សេរី និង​យុត្តិ​ធម៌​ មាន​តម្លា​ភាព សន្តិ​ភាព​ គ្មាន​អំពើ​ហិង្សា​ និង​រលូន។ នេះ​ឆ្លុះ​បញ្ចាំង​ឲ្យ​ឃើញ​ថា ប្រជា​ធិប​តេយ្យ​កម្ពុជា​​មិន​មែន​គ្រាន់​តែ​មាន​ភាព​ចាស់​ទុំ​ប៉ុណ្ណោះ​ទេ​ ​ប៉ុន្តែ ថែម​ទាំង​មាន​ចារិក​​ល្អ​ផ្នែក​នយោ​បាយ​ទៀត​ផង”។ នៅ​ក្នុង​សន្និសីទ្ធ​សារ​ព័ត៌​មាន​​កាល​ពី​ព្រឹក​ម្សិល​មិញ​ ក្រុម​អ្នក​សង្កេតការណ៍​ទាំង​នេះ​បាន​លើក​ឡើង​​ជា​ថ្មី​ម្តង​ទៀត​ អំពី​ការ​វាយ​តម្លៃ​​ខ្ពស់ចំពោះ​ការ​បោះ​ឆ្នោត​នីតិកាល​នេះ ទោះ​​បី​ជា លោក សម រង្ស៊ី ប្រធាន​គណ​បក្ស​សង្គ្រោះ​​ជាតិ​បាន​ធ្វើ​សន្និសីទ្ធ​សារ​ព័ត៌​មាន​ ដើម្បី​បដិ​សេធ​លទ្ធ​ផល​នៃ​ការ​បោះ​ឆ្នោត​ក៏​ដោយ​។ លោក សម រង្ស៊ី បាន​ចោទ​ប្រកាន់​ថា មាន​ភាព​មិន​ប្រក្រតី​ជា​ច្រើន​បាន​កើត​ឡើង​ ហើយ​​បាន​អំពាវ​នាវ​ឲ្យ​មាន​ការ​បង្កើត​គណៈ​កម្មា​ធិការ​មួយ​ ដើម្បី​សើុប​អង្កេត​លទ្ធ​ផល​នេះ។ នៅ​ពេល​អ្នក​សារព័ត៌​មាន​សួរអំពី​សេចក្តី​រាយ​ការណ៍​ដែលថា មាន​ឈ្មោះ​ជាន់​គ្នា​​ក្នុង​បញ្ជី​ឈ្មោះ​​អ្នក​បោះ​ឆ្នោត និង​អ្នក​បោះ​ឆ្នោត​ជា​ច្រើន​ដែល​បាន​និយាយថា ខ្លួន​រក​ឈ្មោះមិន​ឃើញ​នៅ​ក្នុង​បញ្ជី​ ចម្លើយ​របស់​ក្រុម​អ្នក​សង្កេតការណ៍​អន្តរ​ជាតិ​ទាំង​នេះ​មាន​លក្ខណៈ​​ជា​ទស្សន​វិជ្ជា​។ លោក មូសាហីត ហូសេន សាយីត (Mu-​shahid​ Hussain Sayed) អគ្គលេខាធិការអង្គការ​CAPDI បាន​លើក​ឡើង​ថា គ្មាន​ប្រទេស​ណា​បាន​រៀប​ចំ​ការ​បោះ​ឆ្នោត​ប្រកប​ដោយ​យុត្តិ​ធម៌​ទាំង​ស្រុង​ទេ សូម្បីតែ​ប្រទេស​ប្រកាន់​លទ្ធិ​​ប្រជា​ធិប​តេយ្យ​នៅ​លោក​ខាង​លិចក៏ដោយ។ លោក​បាន​មាន​ប្រសាសន៍​ថា “ ជា​អកុសល​ ប្រព័ន្ធ​ផ្សព្វ​ផ្សាយ​ចង់​កាត់​បន្ថយ​រឿង​រ៉ាវ​ច្រើន​​ពេក​។ តើ​វា​មាន​ភាព​សេរី និង​យុត្តិ​ធម៌​ដែរ​​ឬ​ទេ។ ចម្លើយ​អាច​មាន ឬមិន​មាន ក៏​ប៉ុន្តែ ​វា​ត្រូវតែមាន​ចម្លើយ​លាយ​ឡំ​គ្នា​ច្រើន​ជាង​មុន”។ លោក​បាន​លើក​ឡើង​បន្ថែម​ទៀត​ថា គុណ​វិបត្តិ​ដែល​ទំនង​ជា​កើត​ឡើង​ “ មិន​បាន​ប៉ះពាល់​ជាក់​ស្តែង​ទៅ​លើ​ដំណើរ​ការ​បោះ​ឆ្នោត​ទេ”។ ការ​បោះ​ឆ្នោត​ជាតិ​កាល​ពី​ឆ្នាំ​២០០៨ បាន​​ទាក់​ទាញ​អ្នក​សង្កេត​ការណ៍​អន្តរ​ជាតិ​៥០០​នាក់​ ​ដែល​ភាគ​ច្រើន​មក​ពី​សហ​ភាព​អឺរ៉ុប​ ក៏​ប៉ុន្តែ ឆ្នាំ​នេះ​សហ​ភាព​អឺ​រ៉ុប​មិន​បាន​បញ្ជូន​​អ្នក​សង្កេត​​ការណ៍​របស់​ខ្លួន​មក​ទេ​​ ដោយ​បាន​លើក​ឡើង​​ថា ខ្លួន​មិន​បាន​ទទួល​សំណើ​ណា​មួយ​ទេ ហើយ​ថា អនុសាសន៍​ដែល​ក្រុម​អ្នក​សង្កេត​ការណ៍​របស់​ខ្លួន​បាន​ធ្វើ​ឡើង​កាល​ពី​ឆ្នាំ​២០០៨ មិន​ត្រូវ​បាន​ទទួល​យក​ទេ​។ ស្ថាន​ទូត​​អាមេរិក​ ក៏​បាន​ឲ្យ​ដឹង​ផង​ដែរ​ថា ខ្លួន​បាន​សម្រេច​បញ្ជូន​ត្រឹម​តែ​ “​ អ្នក​ចុះ​ពិនិត្យ​ក្រៅ​ផ្លូវ​ការ” ទៅ​កាន់​​ការិយាល័យ​បោះ​ឆ្នោត​​ មិន​មែន​អ្នក​សង្កេត​ការណ៍​ផ្លូវ​ការ​ទេ។ យោង​តាម​អីុម៉េល​របស់​លោក ជុង អីុយុង (Chung Euiyong) អគ្គ​លេខា​ធិការ​អង្គការ​ ICAPP ដែល​បាន​ផ្ញើ​ចេញ​កាល​ពី​ខែ​មុន​ បាន​បង្ហាញ​ថា ក្រុម​អ្នក​សង្កេត​ការណ៍​ដែល​បាន​មក​ប្រទេស​កម្ពុជា​ក្នុង​ឆ្នាំ​នេះ ​ទទួល​បានការ​រ៉ាប់​រង​​ផ្នែក​ចំណាយ​ពី​គណ​បក្ស​ប្រជា​ជន​កម្ពុជា​៕ ប្រែ​សម្រួល​ដោយ កង សុធា

រាជ​​​ធានី​​​ភ្នំពេញ​​​មាន​​សភាព​​​ស្ងប់ស្ងាត់​​​ពេល​​​​​​អ្នក​​​បោះ​​​ឆ្នោត​​​ធ្វើ​​​ដំណើរ​​​ត្រឡប់​​​ពី​​​ខេត្ត​​​មក​​​វិញ

ពេល​​​លទ្ធផល​​​នៃ​​​ការ​​​បោះ​​​ឆ្នោត​​​បង្ហាញ​​​ថា ​​​គណបក្ស​​​ប្រជា​​​ជន​​​កម្ពុជា​​​​​​បាន​​​បាត់​​​បង់​​​សន្លឹក​​​ឆ្នោត​​​យ៉ាង​​​ច្រើន​​​​​​កាល​​​ពី​​​ម្សិលមិញ​​​ ​​​ហាង​​​និង​​​ផ្សារ​​​នានា​​​​​​នៅ​​​ទូទាំង​​​រាជ​​​ធានី​​​ភ្នំពេញ​​​​​​នៅ​​​បិទ​​​នៅ​​​ឡើយ​​​ ប៉ុន្តែ​​​​​​មន្ត្រី​​​រដ្ឋា​​​ភិបាល​​​បាន​​​លើក​​​ឡើង​​​ថា ភាព​​​ស្ងប់​​​ស្ងាត់​​​នេះ​​​មិន​​​មែន​​​ដោយ​​​សារ​​​តែ​​​ប្រជា​​​ពល​​​រដ្ឋ​​​​​​មាន​​​ការ​​​ភ័យ​​​ខ្លាច​​​អំពី​​​ចលាចល​​​នៅ​​​ក្នុង​​​រាជ​​​ធានី​​​​​​ភ្នំពេញ​​​​​​នោះ​​​ទេ។ នៅ​​​ពេល​​​ការ​​​បោះ​​​ឆ្នោត​​​បាន​​​បិទ​​​កាល​​​ពី​​​ថ្ងៃ​​​អាទិត្យ​​​ អ្នក​​​រស់​​​នៅ​​​ក្នុង​​​រាជ​​​ធានី​​​ភ្នំពេញ​​​មួយ​​​ចំនួន​​​បាន​​​តម្រង់​​​ជួរ​​​គ្នា​​​​​​ចាំ​​​ដក​​​លុយ​​​ចេញ​​​​​​ពី​​​ម៉ាស៊ីន​​​អេធីអឹម​​​ (ATMS) រីឯ​​​អ្នក​​​បើក​​​បរ​​​វិញ​​​បាន​​​នាំ​​​គ្នា​​​ទៅ​​​ស្ថានីយប្រេង​​​ឥន្ធនៈ​​​ដើម្បី​​​​​​ចាក់​​​សាំង​​​រថយន្ត​​​របស់​​​ខ្លួន​​​ ខណៈ​​​អំពើ​​​ហិង្សា​​​​​​បាន​​​ផ្ទុះ​​​ឡើង​​​​​​រវាង​​​ប្រជា​​​ពល​​​រដ្ឋ​​​មាន​​​កំហឹង​​​​​​មួយ​​​ក្រុម​​​ និង​​​មន្ត្រី​​​នគរបាល​​​នៅភាគ​​​ខាង​​​ត្បូង​​​រាជ​​​ធានី​​​។ លោក​​​ កើត​​​ ឆែ នាយ​​​ខុទ្ទកាល័យ​​​សាលា​​​រាជ​​​ធានី​​​ភ្នំពេញ​​​ បាន​​​លើក​​​ឡើង​​​ថា “ ខ្ញុំ​​​ក៏​​​ទទួល​​​បាន​​​ព័ត៌មាន​​​អំពី​​​​​ការ​​​បិទហាង​​​ និង​​​ផ្សារ​​​នេះ​​​ដែរ​​​​​​។ ប៉ុន្តែ​​​វា​​​មិន​​​មែន​​​ដោយ​​​សារ​​​តែ​​​ប្រជា​​​​​​ពល​​​រដ្ឋ​​​ភ័យ​​​ខ្លាច​​​នោះ​​​ទេ​​​។ ខ្ញុំ​​​គិត​​​ថា ប្រជា​​​ពល​​​រដ្ឋ​​​​​​ដែល​​​ទៅ​​​បោះ​​​ឆ្នោត​​​នៅ​​​មិន​​​ទាន់​​​វិល​​​ត្រឡប់​​​ពី​​​ស្រុក​​​កំណើត​​​របស់​​​ខ្លួនវិញ​​​ទេ​​​”​​​។ លោក ផៃ ស៊ីផាន អ្នក​​​នាំពាក្យ​​​ទី​​​ស្ដីការ​​​គណៈ​​​រដ្ឋ​​​មន្ត្រី​​​ ក៏​​​បាន​​​លើក​​​ឡើង​​​ដែរ​​​ថា...

ស្ថានទូត​នានា​​ចេញ​សេចក្ដី​ថ្លែង​​ការណ៍​​បន្ទាប់​ពី​ការ​បោះ​ឆ្នោត​ចប់

បន្ទាប់​ពី​ស្ថានទូត​សហរដ្ឋ​អាមេរិក​ប្រចាំ​រាជ​ធានី​ភ្នំពេញ​បាន​ចេញ​សេចក្ដី​ថ្លែងការណ៍​​មួយ​កាល​ពី​យប់​ថ្ងៃអាទិត្យ​ អប​អរ​សាទរ​ប្រជា​​ពល​រដ្ឋ​កម្ពុជា​ចំពោះ​​ការ​បោះ​ឆ្នោត​​ដោយ​សន្តិ​វិធី​ ប៉ុន្តែ​បាន​ព្រមាន​ពលរដ្ឋ​របស់​ខ្លួន​ថា នឹង​អាច​​មាន​ភាព​ចលាចល​កើត​ឡើង​នោះ​ កាល​ពី​ម្សិល​​មិញ​ស្ថាន​កុងស៊ុល​ផ្សេង​ៗ​ទៀត​ក៏​បាន​ចេញ​សេចក្ដី​ថ្លែង​ការណ៍​ដូច​គ្នា​នេះ​ផង​ដែរ។ ស្ថាន​ទូត​បារាំង​បាន​អប​អរសាទរ​ប្រទេស​កម្ពុជា​ក្នុង​ការ​បោះ​ឆ្នោត​នេះ​ ប៉ុន្តែ បាន​ណែនាំ​​ពលរដ្ឋ​របស់​ខ្លួន​ឲ្យ​ជៀសវាង​ការ​ដង្ហែក្បួន​​នយោបាយ​ណាមួយ​។ លោក នីកូឡាស់​ ​ប៊ូឌង់ (Nicolas Baudouin) លេខា​ទី​១​ប្រចាំ​ស្ថាន​ទូត​បារាំង​បាន​លើក​ឡើង​​តាម​អុីម៉េលថា “ យើង​ពិត​ជា​មាន​ការ​សោក​ស្ដាយ​ខ្លាំង​ណាស់​​ដែល​មាន​ឧប្បទ្ទវ​ហេតុ​មួយ​​ចំនួន​បាន​កើត​ឡើង​។ យើង​សូម​អំពាវ​នាវ​ឲ្យ​​គណបក្ស​នយោបាយ​ទាំង​អស់​ដែល​ពាក់​ព័ន្ធ​ដោះ​ស្រាយ​ជម្លោះ​នេះ​តាមមធ្យោបាយ​ស្រប​​ច្បាប់​ និង​ប្រកប​ដោយ​សន្តិវិធី​”។ ស្ថានទូត​ជប៉ុន​ក៏​បាន​ណែនាំ​ពលរដ្ឋ​របស់​ខ្លួន​ឲ្យ​ជៀស​​វាង​ពី​ការ​ដង្ហែក្បួន​នយោបាយ​នានាដែរ។ នៅ​ពេល​សួរ​អំពី​លទ្ធផល​ និង​ការ​ច្រាន​ចោល​នូវ​លទ្ធផល​នៃ​ការ​បោះ​ឆ្នោត​របស់​គណ​​បក្ស​ប្រឆាំង​នោះ​លោក តាកា យ៉ូហ្ស៊ី កូរ៉ូម៉ីយ៉ា ​(Takayoshi Kuromiya) ឯក​អគ្គ​កុង​ស៊ុល​​ប្រចាំ​ស្ថានទូត​​មាន​ប្រសាសន៍​ថា “ នៅ​ត្រង​់​​​ដំណាក់​​​កាល​​នេះ​​វា​ជា​ការ​លឿន​ពេក​​ក្នុង​​ការ​ចេញ​សេចក្ដី​ថ្លែង​ការណ៍​ណា​មួយ​នោះ​។ វា​មាន​ការ​​លំបាក​ណាស់​ក្នុង​ការ​និយាយ​ថា តើ​ការ​បោះ​ឆ្នោត​នេះ​ប្រកប​ដោយ​​សេរី​​​ឬ​អត់​នោះ​”។ ស្ថានទូត​អូស្ត្រាលី​បាន​បដិសេធ​មិន​​ធ្វើ​សេចក្ដី​អត្ថាធិប្បាយ​អំពី​ករណី​នេះ​ទេ​ រីឯ​សហ​ភាព​អឺរ៉ុប​ និង​ស្ថានទូត​អង់គ្លេស​វិញ​បាន​លើក​​​ឡើង​ថា ខ្លួន​នឹង​ចេញ​សេចក្ដី​ថ្លែងការណ៍​មួយ​ “ ពាក់​ព័ន្ធ​នឹង​ករណី​នេះ​” ដែរ៕ ប្រែសម្រួលដោយ ឃិន ណៃ

លទ្ធផល​​​នៃ​​​ការ​​​បោះ​​​ឆ្នោត​​​ឆ្លុះ​​​បញ្ជាំង​​​ពី​​​ប្រជា​​​ប្រិយភាព​​លោក ហ៊ុន សែន និងផែនការរបស់CPP

រយៈ​​​ពេល​​​មួយ​​​ខែ​​​មុន​​​ការ​​​បោះ​​​ឆ្នោត​​​ជាតិ​​​ ​កាលពី​ថ្ងៃ​អាទិត្យ​​នេះ មុខ​​​របស់​​​លោក​​​នាយក​​​រដ្ឋ​​​មន្ត្រី​​​ ហ៊ុន សែន គឺ​​​ឃើញ​​​មាន​​​នៅ​​​គ្រប់​​​​​​ទី​​​កន្លែង​​​​​​ក្នុង​​​ប្រទេស​​​កម្ពុជា​​​។ នៅ​​​តាម​​​បណ្ដោយ​​​មហាវិថី​​​នានា​​​ក្នុង​​​រាជ​​​ធានី​​​ភ្នំពេញ​​​ លោក​​​ ហ៊ុន សែន ដែល​​​មាន​​​មុខ​​​​​​ក្នុង​​​ផ្ទាំង​​​ឃោសនា​​​របស់​​​គណបក្សប្រជា​​​ជន​​​កម្ពុជា​​​ បាន​​​​​បញ្ចេញ​​​ស្នាម​​​ញញឹម និង​​​គ្រវីដៃ​​​ដាក់​​​អ្នក​​​ធ្វើ​​​ដំណើរ​​​ឆ្លង​​​កាត់​​​ទាំង​​​ឡាយ​​​។ នៅ​​​តាម​​​បណ្ដា​​​ខេត្ត​​​ មុខ​​​របស់​​​នាយក​​​រដ្ឋ​​​មន្ត្រី​​​រូប​​​នេះ​​​ត្រូវ​​​បាន​​​បង្ហាញ​​​ក្នុង​​​ផ្ទាំង​​​ឃោសនា​​​ធំៗ​​​តាម​​​បណ្ដោយ​​​ផ្លូវនានា​​​​​​ ដោយ​​​លើក​​​ដៃ​​​សំពះ​​​ប្រជា​​​ជន​​​ ឬ​​​អង្គុយ​​​​​​​​​​​បង់​​​ក្រមាក្នុង​​​វាល​​​ស្រែ​​​​​​។ ក្នុង​​​សុន្ទរកថា​​​រយៈ​​​​​ពេល​​​ប៉ុន្មាន​​​ខែ​​​មុន​​​ការ​​​បោះ​​​ឆ្នោត​​​ លោក ហ៊ុន សែន បាន​​​ចេញ​​​មុខ​​​យ៉ាង​​​ខ្លាំង​​​ក្នុង​​​យុទ្ធនាការ​​​ឃោសនា​​​របស់​​​គណ​​​បក្ស​​​ប្រជា​​​ជន​​​។ ឃ្លា​​​មួយ​​​ដែល​​​គេ​​​តែង​​​បាន​​​ឮ​​​ក្នុង​​​សុន្ទរកថា​​​របស់​​​លោក ហ៊ុន សែន ខណៈ​​​ការ​​​បោះ​​​ឆ្នោត​​​ខិត​​​ជិត​​​ចូល​​​មក​​​ដល់​​​នោះ​​​ គឺ​​​...

ផ្លូវ​ជុំវិញ​ភូមិគ្រឹះ​របស់​លោក ហ៊ុន សែន​ត្រូវបិតរយៈ​ពេល​ពីរ​ថ្ងៃ​បន្ទាប់​ពី​ការ​បោះ​ឆ្នោត​ជាតិ​បានបញ្ចប់

ផ្លូវ​ទាំងអស់​ដែល​នៅ​ជុំវិញ​ភូមិ​គ្រឹះ​របស់​លោក​នាយក​រដ្ឋ​មន្ត្រី​ ហ៊ុន សែន ក្នុង​រាជ​ធានី​ភ្នំ​ពេញ​ ត្រូវ​បាន​បិទ​មិន​ឲ្យ​មាន​ការ​ចេញ​ចូល​​អស់​រយៈ​ពេល​ពីរ​ថ្ងៃ​ហើយ បន្ទាប់​ពី​ការ​បោះ​​ឆ្នោត​ជាតិ​បាន​បញ្ចប់​កាល​ពី​ថ្ងៃ​អាទិត្យ។ រនាំង​​ដែក​បានបិទ​ផ្លូវ​នរោត្តម​ សីហនុ និង​សុរា​ម្រឹត ដែល​​នៅ​ជុំវិញ​វិមាន​ឯក​រាជ្យ។ ក៏​ប៉ុន្តែ រថ​យន្ត​​​ពាក់ស្លាក​លេខ​កាទូត​​មក​ពី​ស្ថាន​ទូត​អាមេរិក​​​​ត្រូវ​បាន​គេ​ឃើញ​កាល​ពី​រសៀល​ម្សិល​មិញ​ថា ទទួល​បាន​ការ​អនុញាតឲ្យ​​ឆ្លង​កាត់​តំបន់រក្សា​សន្តិសុខ​នេះ កាល​ពី​ពេល​។ ​ថ្ងៃ​អាទិត្យ ​មន្ត្រី​កង​​រាជ​អាវុធ​ហត្ថ​ជា​ច្រើន​រយ​នាក់​​ត្រូវ​បាន​ដាក់​​ត្រៀម​ ក៏​ប៉ុន្តែ កាល​​ពី​ម្សិល​មិញ​​មន្ត្រី​ទាំងនេះ​ ភាគច្រើន​ត្រូវ​បាន​ការពា​រ​ដោយ​មន្ត្រី​នគរ​បាល​​ចរាចរ ទោះ​បី​ជា​​​កម្លាំង​កង​រាជ​អាវុធ​ហត្ថ​មួយ​ចំនួន​តូច​ នៅ​បង្ហាញ​វត្តមាន​ក៏​ដោយ​។ លោកឧត្តម​សេនីយ៍​ទោ​ ខេង ទីតូ អ្នក​នាំ ពាក្យ​កង​រាជ​អាវុធ​ហត្ថ​លើ​ផ្ទៃ​ប្រទេស​បាន​ថ្លែង​ថា “ កម្លាំង​យើង​កំពុង​ឈរ​ជើង​​ការ​ពារ​ហេតុ​ការណ៍​ដែល​អាច​កើត​មាន​ឡើង​​”។ មន្ត្រី​​​សស៊ើបអង្កេត​មួយ​រូប​បាន​និយាយ​ដោយ​មិន​​បញ្ចេញ​ឈ្មោះ​ថា ការ​បិទ​ផ្លូវ​នេះ​មាន​គោល​បំណង​ទប់​ស្កាត់​កុំឲ្យ​យុវជនគណ​បក្ស​សង្គ្រោះ​ជាតិ​​​ទៅ​ប្រមូល​ផ្តុំ​គ្នា​តវ៉ា​លទ្ធផល​បោះ​ឆ្នោត៕ ប្រែ​សម្រួល​ដោយ កង សុធា

លទ្ធផល​​​ផ្លូវ​​​ការ​​​ចុង​​​ក្រោយ​​​នៃ​​​ការ​​​បោះឆ្នោត​​​នឹង​​​ត្រូវ​​​ចេញ​​​ផ្សាយ​​​នៅ​​​ពីរ​​​សប្ដាហ៍​​​ក្រោយ​​​​​​

លោក​​​ ទេព នីថា អគ្គលេខាធិការ​​​គណៈ​​​កម្មាធិការ​​​ជាតិ​​​រៀប​​​ចំការ​​​បោះឆ្នោត​​​​​​ហៅ​​​កាត់​​​ថា គ.ជ.ប.  បាន​​​លើក​​​ឡើង​​​កាល​​​ពី​​​ម្សិល​​​មិញ​​​ថា លទ្ធផល​​​ចុង​​​ក្រោយ​​​​​​នៃ​​​ការ​​​បោះ​​​ឆ្នោត​​​​​​ជាតិ​​​កាលពី​​​ថ្ងៃ​​​អាទិត្យ​​​ នឹង​​​ត្រូវ​​​ប្រកាស​​​នៅ​​​ពាក់​​​កណ្ដាល​​​​​​ខែ​​​សីហា​​​។ លោក​​​បាន​​​មាន​​​ប្រសាសន៍​​​ថា ថ្ងៃ​​​ដែល​​​​​​អាច​​​នឹង​​​ចេញ​​​លទ្ធផល​​​ចុង​​​ក្រោយបំផុត​​​​​​ ប្រហែល​​​ជា​​​នៅ​​​ដើម​​​ខែ​​​កញ្ញា​​​។ លោក​​​បាន​​​បន្ថែម​​​ថា ល្បឿន​​​នៃ​​​ការ​​​ប្រកាស​​​​​​លទ្ធ​​​ផល​​​គឺ​​​អាស្រ័យ​​​លើ​​​ថា​​​ តើ​​​គ.ជ.ប. និង​​​ក្រុម​​​ប្រឹក្សា​​​ធម្មនុញ្ញ​​​កម្ពុជា​​​នឹង​​​​​​ទទួល​​​​​​បាន​​​ពាក្យ​​​បណ្ដឹង​​​ច្រើន​​​ប៉ុណ្ណា​​​​​​ពាក់​​​​​​ព័ន្ធ​​​នឹង​​​ភាព​​​មិន​​​ប្រក្រតី​​​។ កាលពី​​​ម្សិលមិញ​​​ គណបក្ស​​​ប្រឆាំង​​​បាន​​​ច្រាន​​​ចោល​​​លទ្ធផល​​​បឋម​​​នៃ​​​ការ​​​បោះ​​​​​​ឆ្នោត​​​ដែល​​​ខ្លួន​​​ទទួល​​​បាន​​​អាសនៈ​​​សភា​​​ចំនួន​​​៥៥​​​អាសនៈ​​​ទល់​​​នឹង​​​អាសនៈ​​​ចំនួន​​​៦៨ ដែល​​គណ​​​ប​​​​​ក្ស​​​ប្រជាជន​​​កម្ពុជា​​​ទទួល​​​បាន​​​ ដោ​​​យ​​​លើក​​​ឡើង​​​ថា មាន​​​ការ​​​ក្លែង​​​បន្លំ​​​ច្រើន​​​។​ លោក​​​បាន​​​បន្ថែម​​​ថា “គ.ជ.ប. នៅ​​​មិន​​​ទាន់​​​ប្រកាស​​​ពី​​​តួលេខ​​​នៃ​​​សំឡេង​​​គាំទ្រ​​​ដែល​​​គណ​​​បក្ស​​​នីមួយ​​​ៗ​​​​​​ទទួល​​​បាន​​​នៅ​​​ទូទាំង​​​ប្រទេស​​​នៅ​​​ឡើយ​​​ទេ​​​។ សាធារណ​​​ជន​​​អាច​​​វាយ​​​តម្លៃ​​​ដោយ​​ខ្លួន​​​ឯង​​​បាន”​​ តាម​​​រយៈ​​​ការ​​​មើល​​​លទ្ធ​​​ផល​​​ពី​​​ខេត្ត​​​មួយ​​​ទៅ​​​ខេត្ត​​​មួយ​​​ ដែល​​​ប្រកាស​​​តាម​​​កញ្ចក់​​​ទូរទស្សន៍​​​។ លោក​​​បាន​​​មាន​​​ប្រសាសន៍​​​ថា...

ប្រព័ន្ធ​បោះ​ឆ្នោត​ផ្តល់​​ផល​ប្រយោជន៍​ដល់​​គណបក្ស​ដែល​​​មាន​​​សំឡេង​​​គាំទ្រ​​​​​​ច្រើន​​​ជាងគេ​​​បំផុត

​នៅ​ពេល​លោក​ ខៀវ​ កាញារីទ្ធ​ រដ្ឋ​មន្ត្រី​ក្រសួង​ព័ត៌​មាន​បាន​ផ្សព្វ​ផ្សាយ​លទ្ធផល​បឋម​នៃការ​បោះឆ្នោត​ជាតិ​នៅ​តាម​ទំព័រ​​​ហ្វេសប៊ុក​ របស់​លោក​កាល​ពីយប់​ថ្ងៃអាទិត្យ​ តួលេខ​នោះ​បង្ហាញ​ថា  អាសនៈ​របស់​គណបក្ស​ប្រជា​ជន​កម្ពុជាបាន​​​​ធ្លាក់​ចុះ​១៧,៧ភាគរយ  ​ពី​ចំនួន​​​៩០​អាសនៈ​មក​នៅ​ត្រឹមតែ​​​​៦៨​អាសនៈនៅ​ក្នុង​រដ្ឋ​សភា​ ដែល​មាន​១២៣​អាសនៈ​។ ទោះ​ជាយ៉ាង​ណា​  លទ្ធផល​លម្អិត​ថែម​ទៀត​​ដែល​ចេញ​នៅ​យប់​ជ្រៅ​ថ្ងៃ​អាទិត្យ​ដែរ​នោះ​បង្ហាញ​ពី​ចំនួន​ខុស​គ្នា​បន្តិច​បន្តួច​ដោយ​សំឡេង​ឆ្នោ​ត​របស់​គណបក្ស​កាន់​អំណាច​ធ្លាក់​ចុះ​ពី ៥៨,១​​ភាគ​រយ​នៃ​សន្លឹក​ឆ្នោត​ទាំង​អស់​មក​នៅ​ត្រឹម​ ៤៩,២ភាគរយ​វិញ​ គឺធ្លាក់​ចុះ​ ៨,៩ភាគ​រយ​ទៀត​។ ភាព​ខុស​គ្នា​រវាង​តួលេខ​ទាំង​ពីរនេះ​បង្ហាញ​ឲ្យ​ឃើញ​យ៉ាង​ច្បាស់​ពី​អាសនៈ​ដែល​គណបក្ស​ប្រឆាំង​ទទួល​បាន​ និង​បង្ហាញ​ពី​រូប​មន្ត​សម្រាប់​គណនា​អាសនៈ​របស់​គណបក្ស​នយោបាយ​។ រូបមន្ត​ ជេសហ្វើសុន​(Jefferson)​ ដែល​គេ​បានយក​មក​ប្រើ​​ស្ងាត់​ៗ​នៅ​មុន​ការ​បោះ​ឆ្នោត​ឆ្នាំ​១៩៩៨ និង​ត្រូវ​បាន​ផ្សព្វ​​​ផ្សាយ​​​​តែ​បន្ទាប់​ពីការ​បោះ​ឆ្នោត​នៅ​ឆ្នាំនោះ ផ្តល់​​គុណ​សម្បត្តិ​​ដល់​គណបក្ស​ដែល​ទទួល​បាន​សំឡេងឆ្នោត​​ច្រើន​ជាងគេ​នៅ​ក្នុង​មណ្ឌល​​​​ណាមួយ។ ចំនួន​អាសនៈ​នៅ​តាម​មណ្ឌល​ណាមួយ​នោះ​ត្រូវ​ចែក​នឹង​ចំនួន​អ្នក​បោះ​​ឆ្នោត​​។ ប៉ុន្តែ សន្លឹក​ឆ្នោត​ដែល​នៅ​សល់​ពី​អាសនៈ​ចុង​ក្រោយ​នឹង​បាន​ទៅ​លើ​គណបក្ស​ដែល​ទទួល​បាន​សំឡេង​ឆ្នោត​​ច្រើន​ជាង​គេ​បំផុត។ មុន​ឆ្នាំ​១៩៩៨​អង្គការ​សហ​​​ប្រជា​​​ជាតិ​បាន​ស្នើ​ឲ្យ​ប្រើ​រូបមន្តមួយ​​ ដែល​ត្រូវ​បាន​​បង្កើត​ឡើង​ដើម្បីធ្វើ​ឲ្យ​​មណ្ឌល​មួយ​មាន​​គណបក្ស​​​ចម្រុះ​​​ទៅ​វិញ​។ លោក ធន សារាយ ប្រធាន​ក្រុម​ប្រឹក្សា​នាយក​នៃ​គណៈកម្មា​ធិការ​ដើម្បី​ការ​​បោះ​ឆ្នោត​ដោយ​សេរី​  និង​យុត្តិ​ធម៌​​នៅ​កម្ពុជា (ខុម​ហ្វ្រែល​) ​បាន​មាន​ប្រសាសន៍​បន្ទាប់​ពីកា​រ​​​បោះ​ឆ្នោត​ឆ្នាំ​១៩៩៨​ថា  តាម​រូប​មន្ត​ដែល​គេយក​មក​ប្រើ​នៅ​ក្នុង​ឆ្នាំ​១៩៩៣​ រូប​មន្ត​ថ្មី​នេះ​បាន​ធ្វើ​ឲ្យ​គណ​បក្ស​ប្រជាជន​កម្ពុជា​ទទួល​បាន​អាសនៈ​លើស ​ពី​អាសនៈ​ដែល​ខ្លួន​ទទួល​បាន​ចំនួន​ប្រាំមួយថែម​​ទៀត​។ លោក​បាន​មាន​ប្រសាសន៍​កាល​ពីខែ​សីហា​ ឆ្នាំ​១៩៩៨​ថា “ គណបក្ស​ប្រជាជន​កម្ពុជា​ឆ្លាតណាស់។​ ពួក​គេ​ដឹងថា គណបក្ស​ប្រឆាំង​បែក​បាក់​គ្នា​ ហើយ​ខ្លួន​គេ​គឺជា​គណ​​​បក្ស​​ធំ​ជាង​គេ​ និង​ត្រូវ​ប្រើ​ប្រាស់​រូប​មន្ត​នេះ ដើម្បី​ផ្តល់​ផល​ប្រយោជន៍​ដល់​ពួក​គេ​”។ ដូច្នេះ​ហើយ​រូប​មន្ត​​នេះនៅតែប្រើ​​ក្នុង​រយៈ​​ពេល​មួយ​ទសវត្សរ៍​ក្រោយ​មក​។ ​ក្នុង​ឆ្នាំ​២០០៣ ​គណបក្ស​ប្រជាជន​កម្ពុជា​​ទទួល​បាន​សំឡេង​គាំទ្រ​៤៧,៣​ភាគ​រយ​ ប៉ុន្តែ ទទួល​បាន​៧៣​អាសនៈ​ គឺ​ស្មើ​នឹង​៥៩​ភាគ​រយ​នៃ​អាសនៈ​រដ្ឋសភា​ទាំង​១២៣​។ នៅឆ្នាំ​២០០៨​ គណបក្ស​ សម រង្ស៊ី និង​គណ​បក្ស​សិទ្ធិ​មនុស្ស​​បាន​ទទួល​សំឡេង​គាំទ្រ​រួម​គ្នា​ចំនួន​២៨​,៥​ភាគ​រយ​ ប៉ុន្តែ ទទួល​បាន​តែ​២៩​អាសនៈ​ប៉ុណ្ណោះ​  គឺ​ស្មើ​នឹង​២៣,៦​ភាគ​រយ​នៃ​អាសនៈ​ទាំង​១២៣​​។ ​គណបក្ស​ប្រជាជន​កម្ពុជា​​ដែល​ទទួល​បាន​អាសនៈ​សល់​ពី​គណបក្ស​ប្រឆាំង​ និង​ពីគណ​បក្ស​តូ​ចៗ​ផ្សេងទៀត​នៅ​ឆ្នាំ​នោះ​​បាន​ទទួល​៧៣,២​ភាគ​រយ​អាសនៈ​ដែល​​​មាន​​​សំឡេង​ឆ្នោត​គាំទ្រ​​៥៨,១​ភាគ​រយ​ប៉ុណ្ណោះ​​​​។ ទោះ​ជាយ៉ាងណា កាល​ពីថ្ងៃអាទិត្យ​ បើ​គិត​ពី​លទ្ធផល​ដែល​លោក ខៀវ កាញារីទ្ធ​ និង​គណៈកម្មាធិការ​ជាតិ​ប្រឆាំង​ភេរវកម្ម​បាន​ចេញ​កាល​ពីយប់​ថ្ងៃអាទិត្យ​ គណបក្ស​សង្គ្រោះ​ជាតិ​បាន​ទទួល​សំឡេង​ឆ្នោត​៤៤,២​ភាគរយ​ និង​អាច​ទទួល​បាន​៤៤,៧​ភាគ​រយ​នៃអាសនៈ​ទាំង​អស់​។ លោក គល់​ បញ្ញា នាយក​ប្រតិបត្តិ​គណៈ​កម្មាធិការ​ខុមហ្វ្រែល​ បាន​មាន​ប្រសាសន៍​កាល​ពីម្សិលមិញថា  គណបក្ស​ប្រឆាំង​បាន​ទទួល​អាសនៈ​ច្រើន ​ពីព្រោះ​គណបក្ស​នេះ បាន​ដឹង​នៅ​ពេល​ចុង​ក្រោ​យ​ពី​គុណ​សម្បត្តិ​​នៃការ​ឈរ​ឈ្មោះ​ជាគណបក្ស​តែ​មួយ​។ លោក គល់ បញ្ញា បាន​មាន​ប្រសាសន៍ថា “ កា​រផ្លាស់ប្តូរ​រូប​មន្ត   គឺ​ជា​រឿង​នយោបាយ​ និង​មាន​បំណង​ជួយ​ដល់​គណបក្ស​ដែល​ទទួល​បាន​សំឡេង​គាំទ្រ​ច្រើន​។វា​ធ្វើ​ឲ្យ​ងាយ​ស្រួល​ដល់​អ្នក​ឈ្នះ​ក្នុង​ការ​ដឹកនាំ​ប្រទេស​” ។ “ អ៊ុនតាក់​ បាន​ប្រើ​រូប​មន្ត​មួយ​ធ្វើ​ឲ្យ​គណ​បក្ស​ជាច្រើន​ទទួល​បាន​អាសនៈ​នៅ​ក្នុង​សភា​ និង​បាន​ធ្វើ​ឲ្យ​មាន​ការ​លំបាក​ដល់​គណបក្ស​ឈ្នះ​ឆ្នោត​ក្នុង​ការ​ដឹក​នាំប្រទេស​”។ លោក  គល់ បញ្ញា​ បាន​បន្ថែម​ថា ដោ​យ​សារ​ការ​ផ្លាស់​ប្តូរ​រូប​មន្ត​នៅ​ឆ្នាំ១៩៩៨​​ គណបក្ស​ណាមួយ​​​ធំ​​ បើ​​ប្រៀបធៀប​នឹង​គូ​ប្រជែង​របស់​ខ្លួន​​ ​គណបក្ស​នោះអាច​ទទួល​បាន​អាសនៈ​កាន់​តែ​ច្រើនថែម​​ទៀត​​។ “ ការរួម​បញ្ចូល​គ្នា​រវាង​ គណបក្ស​ សម​ រង្ស៊ី និង​គណបក្សសិទ្ធិមនុស្ស​ឥឡូវ​នេះ​បាន​ធ្វើ​ឲ្យ​អាសនៈ​របស់​គណបក្ស​ប្រជាជន​កម្ពុជា​​ធ្លាក់​ចុះ​។ ប្រសិន​បើ គណបក្ស​ទាំង​ពីរនេះ​នៅ​តែ​បែក​បាក់គ្នានោះ គណបក្ស​ទាំង​ពីរ​នេះ​មិន​ទទួល​បាន​លទ្ធផល​បែប​នេះទេ​”។ លោក​ សុន​ ឆ័យ​ អ្នក​នាំពាក្យ​គណបក្ស​សង្គ្រោះ​ជាតិ​បាន​មាន​ប្រសាសន៍ថា  ខណៈ​ពេល​​​ដែល​គណបក្ស​របស់​លោក​នៅ​តែមាន​គម្រោង​​តវ៉ា​នឹង​លទ្ធផល​នៃ​ការ​បោះឆ្នោត​នេះ​ កម្លាំង​រួប​រួម​គ្នា​របស់​គណបក្ស​ប្រឆាំង​បាន​ជួយ​ឲ្យ​គណបក្ស​នេះ​ទទួល​បាន​អាសនៈ​ដែល​ខ្លួន​បាន​បាត់​បង់​ពីមុន​។ លោក​បាន​មាន​ប្រសាសន៍ថា “ គណបក្ស​ប្រឆាំង​នៅ​ពេល​នេះ​ប្រហែល​ជា​អាច​ទទួល​ផល​ប្រយោជន៍ពី​រូប​មន្ត​នេះ​ ពីព្រោះ​យើង​បាន​ឈ្នះ​​នៅ​តាម​បណ្តា​​​ខេត្ត​ធំ​ៗ​ជាច្រើន​។ ប៉ុន្តែ នៅ​ពេល​ដែល​គណបក្ស​ប្រជាជន​កម្ពុជា​​គ្រប់​គ្រង​ការ​បោះ​ឆ្នោត​ ពួក​គេ​ក៏អាច​ប្រើ​ប្រាស់​រូប​មន្តនេះ​ដើម្បី​ទទួល​បាន​អាសនៈ​​​​បន្ថែម​ទៀត​​ដែរ”។ លោក​ សុន​ ឆ័យ​ បាន​បន្ថែម​ថា គួរតែប្តូរ​​​ទៅ​ប្រើ​រូប​មន្ត​របស់​អង្គការ​សហប្រជាជាតិ​វិញ​។ វាឆ្លុះ​បញ្ចាំង​ពី​សំឡេង​​​​ឆ្នោត​ដែល​ប្រជា​ជនគាំទ្រ​​​នៅ​ពេល​ដែល​ពួក​គាត់​ទៅ​បោះ​ឆ្នោត​។ គួរតែបែង​ចែក​អាសនៈ​តាម​រូប​មន្ត​​នោះវិញ​”៕ (រាយការណ៍​បន្ថែមដោយ​ មិុច ដារ៉ា) ប្រែ​​​សម្រួល​​​ដោយ មូល គឹមហឿន

អ្នក​បោះ​ឆ្នោត​នៅ​តំបន់​​​ជន​បទ​​​ក្នុង​​​ប្រទេស​​​កម្ពុជា បាន​​​ដឹង​​​អំពី​​​លទ្ធផល​​​ឆ្នោតតាម​​​ប្រភព​ផ្សេង​ៗ​

អ្នក​បោះ​ឆ្នោត​នៅ​តាម​តំបន់​ជនបទ​​​បាន​ឲ្យ​​​ដឹង​​​​កាល​ពី​ម្សិលមិញ​ថា បន្ទាប់​ពី​​​បាន​​​​រង់​ចាំ​​​​អស់​​​រយៈ​ពេល​ជា​​​ច្រើន​ម៉ោង ខ្លួន​​​​បានដឹង​​​អំពី​​​​លទ្ធផល​​​​នៃ​​​ការ​បោះ​ឆ្នោត​ជ្រើស​តាំង​តំណាង​​​​រាស្ត្រ​កាល​ពី​ថ្ងៃ​​​អាទិត្យ​​​នេះ ​​​​តាម​រយៈ​​​​ការ​​​ចាក់ផ្សាយ​​​តាម​​​ស្ថានីយ​​​វិទ្យុ និង​ទូរទស្សន៍​ឯករាជ្យ​ ​និង​ពាក្យ​ចចាម​អារ៉ាម​និង​​​សាច់​ញាតិ​តាមរយៈ​​​​​​ទូរស័ព្ទ​។ ឈ្មោះ ហៃ សារិន អាយុ​៤៨​ឆ្នាំ​​ដែល​រស់​​​​នៅ​ក្នុង​ក្រុង​សំរោង​​​ ខេត្ត​ឧត្ដរ​មាន​ជ័យ​ បាន​ឲ្យ​​​ដឹង​​​ថា ខ្លួន​​​បាន​ដឹង​​​លទ្ធផល​បឋម​កាល​ពី​ព្រឹក​ម្សិលមិញ ​តាម​រយៈ​វិទ្យុ​អាស៊ី​សេរី​។ លោក​​​បាន​​និយាយ​​​​ថា “ ខ្ញុំ​បាន​ស្ដាប់​វិទ្យុ​គិរីដង​រែក​​​ អំពី​លទ្ធផល​បឋម​ ប៉ុន្តែ​ ខ្ញុំ​បាន​​​ដឹង​ថា​​​ គណបក្ស​ប្រជា​ជន​ឈ្នះ​តាម​រយៈ​សេចក្ដី​រាយការណ៍​ពេល​ព្រឹក​របស់​​​​វិទ្យុ​អាស៊ី​សេរី​”។ កាល​ពី​យប់​ថ្ងៃ​អាទិត្យ លោក ​​​ខៀវ កាញា​​​រីទ្ធ...

បក្សប្រឆាំង​ច្រាន​ចោល​លទ្ធផល​បោះ​ឆ្នោត​ ទាម​ទារ​ស៊ើបអង្កេត

លោក សម រង្ស៊ី ប្រធាន​គណបក្ស​សង្គ្រោះ​ជាតិ​​បាន​មាន​ប្រសាសន៍កាល​ពី​ម្សិលមិញ​ថា គណបក្ស​ប្រឆាំង​បាន​ច្រាន​ចោល​លទ្ធ​ផល​​នៃ​ការ​បោះ​ឆ្នោត​កាល​ពីថ្ងៃ​អាទិត្យ​ និង​បាន​ស្នើ​ឲ្យ​មាន​ការ​ស៊ីបអង្កេត​ដោយ​ឯក​រាជ្យ​លើការ​បោះឆ្នោតនេះ​​​ ដើម្បី​កំណត់​ថា តើ​តម្រូវ​ឲ្យ​មាន​ការ​បោះ​ឆ្នោត​ឡើង​វិញ​ ឬ​យ៉ាង​​ណា​​​។ លោក​ សម រង្ស៊ី បាន​ប្រាប់​សន្និសីទ​សារ​ព័ត៌មាន​នៅ​ក្នុង​ទីក្រុង​ភ្នំពេញថា “ យើង​មិន​​ទទួល​យក​លទ្ធផល​នៃការ​បោះ​​​​ឆ្នោត​នេះ​ទេ។មាន​ភាព​មិន​ប្រក្រតីច្រើន​ណាស់​”។ លោក​ សម រង្ស៊ី​ បាន​មាន​ប្រសាសន៍ថា គួរតែ​បង្កើត​គណៈកម្មាធិការ​ឯករាជ្យ​មួយ​ដែល​មាន​សមាជិក​មក​ពី​គណបក្ស​ប្រឆាំង​ និង​គណបក្ស​កាន់​អំណាច​ ព្រម​ទាំង​អង្គ​ការ​សហប្រជាជាតិ​ និង​តំណាង​រដ្ឋាភិបាល​បរទេស​ ព្រមទាំងអង្គការ​ក្រៅ​រដ្ឋាភិបាល​។ លោក​បាន​មាន​ប្រសាសន៍ថា ផ្អែក​តាម​ការ​រក​ឃើញ​របស់​គណៈកម្មាធិការ​នេះ​ គណ​បក្ស​សង្គ្រោះ​ជាតិ​អាចស្នើ​ឲ្យ​មាន​ការ​បោះ​ឆ្នោត​ឡើង​វិញ​ទាំង​ស្រុង​។ លោក​ សម រង្ស៊ី​ បាន​មាន​ប្រសាសន៍ថា “ដើម្បី​ដោះស្រាយ​បញ្ហា​នេះ​” យើង​ស្នើ​ឲ្យ​បង្កើត គណៈកម្មាធិការ​នយោបាយ​មួយ​​ដែល​មាន​សមាសភាព​មក​ពី​​គណបក្ស​ទាំ​ងពីរ​ អង្គការ​ក្រៅ​រដ្ឋាភិ​បាល​​ ហើយ​យើង​ស្នើ​ឲ្យ​ប្រទេស​ជាមិត្ត​បញ្ជូន​អ្នក​ជំនាញ​មក​ចូល​រួម​នៅ​ក្នុ​ង​គណៈ​កម្មាធិការ​រួម​នេះ ដើម្បី​វាយ​តម្លៃ​ភាព​មិន​ប្រក្រតី​ទាំង​អស់​នៃ​លទ្ធផល​បោះ​ឆ្នោត​នេះ​”។ លោក​បាន​បន្ថែម​ថា “ យើង​ចាប់​អារម្មណ៍​ក្នុង​ការ​រក​យុត្តិធម៌​ឲ្យ​ប្រជាជន​ខ្មែរ​”។ លោក​ កឹម​ សុខា អនុ​ប្រធាន​គណ​បក្ស​សង្គ្រោះ​ជាតិ​​បាន​លើក​ឡើង​សាជាថ្មី​ពីការ​បដិសេធ​របស់​លោក សម រង្ស៊ី ចំពោះ​លទ្ធ​ផល​នៃការ​បោះ​ឆ្នោត​នេះ​។ លោក​ កឹម​ សុខា​ បាន​មាន​ប្រសាសន៍ថា “យើង​កំពុង​ចាត់​វិធាន​ការណ៍​តឹងរ៉ឹង​នៅ​ពេល​នេះ​ពី​ព្រោះ​វា​បង្ហាញ​យ៉ាង​ច្បាស់​ដែល​មិន​ធ្លាប់​មាន​ថា ប្រជាជន​ចង់​ផ្លាស់​ប្តូរ​។ ដូច្នេះ​យើង​មិន​អាច​លេង​សើច​បាន​ទេ​ យើង​ត្រូវ​តែ​ស្វែង​រក​យុត្តិធម៌​ឲ្យ​ពួក​គាត់​”។ លោក​បាន​បន្ថែម​ថា  គណបក្ស​ប្រឆាំង​មិន​ចង់​បាន​អស្ថិរភាព​នៅ​ក្នុង​ប្រទេស​ដែល​បណ្តាល​មក​ពី​ការ​ច្រាន​ចោល​លទ្ធផល​នៃ​ការ​បោះ​ឆ្នោត​នេះទេ​។ លោក​បាន​មាន​ប្រសាសន៍ថា “ ខ្ញុំ​ជឿ​ជាក់​ថា គណបក្ស​​កាន់​​អំណាច​សព្វ​ថ្ងៃ​នេះ​ក៏​ចង់​បាន​ស្ថិរ​ភាព​ដែរ​​។ យើង​ទាំង​ពីរ​មិន​ចង់​​បាន​អស្ថិរភាព​ទេ​”។ កាល​ពីថ្ងៃ​អាទិត្យ គណបក្ស​ប្រឆាំង​ទទួល​បាន​អាសនៈ​៥៥ នៅ​ក្នុង​រដ្ឋ​សភា​ ដែល​មាន​​អាសនៈ​១២៣​  គឺ​កើន​ឡើង​ខ្ពស់​ពី​២៩​អាសនៈ ​ដែល​គណបក្ស ​សម រង្ស៊ី  និង​គណ​បក្ស​សិទ្ធិ​មនុស្ស​ទទួល​បាន​នៅ​ក្នុង​ការ​បោះ​ឆ្នោត​ឆ្នាំ​២០០៨​។​គណបក្ស​ប្រជាជន​កម្ពុជា​បាន​ទទួល​៦៨​អាសនៈ​កាល​ពីថ្ងៃអាទិត្យ​ គឺ​ធ្លាក់​ចុះ​យ៉ាង​ច្រើន​ពី​៩០​អាសនៈ​ដែល​ខ្លួន​ទទួល​បាន​នៅ​​​ក្នុង​ឆ្នាំ​២០០៨​។ នៅ​ពេល​ដែល​ការ​ធ្វើ​សន្និសីទ​របស់​គណបក្ស​សង្គ្រោះ​ជាតិ​មាន​ភាព​ស្ងប់​ស្តាត់​ ប៉ុន្តែ​ រឹង​មាំ​នោះ​ ក្រុម​មន្ត្រី​រដ្ឋាភិបាល​បាន​​និយាយ​កាល​ពីម្សិលមិញថា  ខ្លួន​គ្មាន​បំណង​ចូល​រួម​នៅ​ក្នុង​គណៈកម្មាធិការ​សើុបអង្កេត​ដែល​លោក  សម រង្ស៊ី​  បាន​ស្នើ​ឡើង​នេះ​ទេ​។ នៅ​ពេល​សួរ​អំពី​កា​របង្កើត​គណៈកម្មាធិ​ការ​ដើម្បី​ស៊ើបអង្កេត​ការ​បោះឆ្នោត​កាល​ពី​ថ្ងៃអាទិត្យ​នេះ លោក​ ផៃ ស៊ើផាន​ អ្នក​នាំ​ពាក្យ​ទី​ស្តីការ​គណៈ​រដ្ឋមន្ត្រីបាន​មាន​ប្រសាសន៍ថា  “ ចំណុច​នេះ​មិន​អាច​ទៅ​រួច​នោះ​ទេ​”។ លោក ផៃ​ ស៊ីផាន​ បាន​មាន​ប្រសាសន៍ថា “ ខ្ញុំមិន​គិត​ថា ឆន្ទៈនយោបាយ​ក្នុង​ការ​បង្កើ​ត​គណៈកម្មា​ធិ​ការ​នេះ​អាច​ទៅ​រួច​ទេ​”។ លោក​បាន​បញ្ជាក់​ថា គណៈកម្មា​ធិ​ការ​​បែប​នេះ​ក៏​មិន​ចាំបាច់​ដែរ​​ ព្រោះ​​មធ្យោបាយ​ដោះ​ស្រាយ​លទ្ធផល​បោះ​ឆ្នោត​មាន​រួច​ហើយ​នៅ ក្នុង​គណៈកម្មា​ធិ​ការ​​ជាតិ​រៀបចំការ​បោះ​ឆ្នោត​​ និង​ក្រុម​ប្រឹក្សា​ធម្មនុញ្ញ​។ លោក​ ផៃ ស៊ី​​​ផាន បាន​មាន​ប្រសាសន៍ បន្ត​​​ទៀត​​​ថា “ គណៈ​​​កម្មាធិការ​​​ជាតិ​​​រៀប​​​ចំ​​​ការ​​​​​​បោះ​​​ឆ្នោត​​​មាន​នីតិវិធី​ត្រឹម​ត្រូវ​ និង​មាន​តុលាការ​ស្រប​តាម​ធម្មនុញ្ញ​”​។ អ្នក​រិះគន់​បាន​ចោទ​គ.ជ.ប.​និ​ង​ក្រុម​ប្រឹក្សា​ធម្មនុញ្ញ​ជាយូ​រ​មក​ហើយ​ថា ស្ថិត​នៅ​ក្រោម​ឥទ្ធិពល​របស់​នាយក​រដ្ឋ​មន្ត្រី​ ហ៊ុន​ សែន​​។ លោក​ ឈាង​ វុន សមាជិក​សភាជាន់​ខ្ពស់​​មក​ពី​គណបក្ស​ប្រជាជន​កម្ពុជា​ក៏​បាន​​ជំទាស់​នឹង​គណៈកម្មាធិការ​ស៊ើបអង្កេត​ដែល​ត្រូវ​បាន​ស្នើ​ឡើង​នេះ​ដែរ​។ លោក​ ឈាង​ វុន​ បាន​មាន​ប្រសាសន៍​អំពី​ការ​អំពាវ​នាវរបស់​គណបក្ស​សង្គ្រោះ​ជាតិ​ឲ្យ​មាន​ការ​ស៊ើបអង្កេត​លទ្ធផល​នេះ​ថា “ នេះ​មិន​មែន​ជា​វិធី​ស្រប​ច្បាប់   នេះ​គ្រាន់​តែ​ជាលេស​ ដើម្បី​បាន​អាសនៈ​បន្ថែម​ទៀតនៅ​​​ក្នុង​​​សភា​​​​ប៉ុណ្ណោះ។ ប្រសិន​បើ​យើង​ធ្វើ​តាម​លោក​ សម រង្ស៊ី លើ​ចំណុច​នេះ​ យើង​មិន​ចាំបាច់​មាន​ច្បាប់​បោះ​ឆ្នោត​ទេ​”។ លោក​បាន​បន្ថែម​ថា “ ប្រសិន​បើ​យើង​  មិន​​ពេញ​ចិត្ត​ សូម​ធ្វើ​ពាក្យ​ប្តឹង​ទៅ​ក្រុម​ប្រឹក្សា​ធម្ម​នុញ្ញ​។ ប្រសិន​បើ​គណបក្ស​សង្គ្រោះ​ជាតិ​ប្រើ​កម្លាំង​ខុស​ ពួក​គេ​ត្រូវ​ប្រឈម​នឹង​ច្បាប់”។ លោក​ ផៃ សីុ​ផាន​ និង​លោក​ ឈាន​ វុន ក៏​បាន​មាន​ប្រសាសន៍​ផង​ដែរ​ថា ការ​ទទួល​បាន​​ការ​គាំទ្រ​ច្រើន​របស់គណបក្ស​ប្រឆាំង​កាល​ពីថ្ងៃ​អាទិត្យ​ គឺជា​ការ​បង្ហាញ​ឲ្យឃើញ​ពី​ដំណើរ​ការ​លទ្ធិប្រជាធិបតេយ្យ​រឹង​មាំ​។ ពេល​ស្នើ​សំុ​អត្ថាធិប្បាយ​អំពី​ការ​ច្រាន​ចោល​របស់​មន្ត្រី​គណបក្ស​ប្រជាជន​កម្ពុជា​ចំពោះ​សំណើ​​សំុ​បង្កើត​គណៈកម្មាធិការ​នេះ​ លោក យឹម​ សុវណ្ណ​ អ្នក​នាំពាក្យ​គណបក្ស​សង្គ្រោះ​ជាតិ​បាន​មាន​ប្រសាសន៍ថា វា​ជា​ការ​សម​ហេតុ​ផល​សម្រាប់​ឲ្យ​ ​គ.ជ.ប.​​ និង​ក្រុម​ប្រឹក្សា​ធម្មនុញ្ញ​ស៊ើប​អង្កេត​ភាព​មិន​ប្រក្រតី​នៅ​ក្នុងការ​បោះ​ឆ្នោត​នេះ​។ លោក​បាន​មាន​ប្រសាសន៍ថា “ យើង​អាច​មើល​ឃើញថា គណបក្ស​ប្រជាជន​កម្ពុជា​ គ្រប់​គ្រង​ស្ថាប័ន​រដ្ឋទាំង​អស់​ដូចជា គ.ជ.ប.​ ក្រុមប្រឹក្សា​ធម្មនុញ្ញ​ និ​ងតុលាការ”​។ លោក​ យឹម​ សុវណ្ណ បាន​បន្ថែម​​ដោយ​មិន​បញ្ជាក់​លម្អិត​​ថា “ ប្រសិន​បើ​ គ.ជ.ប.​​ មិន​ព្រម​កែ​ទម្រង់​ទេ​ ពួក​គេ​គឺ​ជាអ្នក​ទទួល​ខុស​ត្រូវ​ចំពោះ​ផល​វិបាក​”។...