គ្រួសារ​របស់​អ្នក​បកប្រែ​ខ្សែភាព​យន្ត​ឯកសារ​សោកស្តាយ​ដែល​ស្ថានទូត​រុស្ស៊ី​មិន​ព្រម​ទទួល​យក​ញត្តិ​របស់​ពួកគេ​

ក្រុម​គ្រួសារ​របស់​លោក​រ៉ាត់ រត្នមុនី​និង​សហគមន៍​រងគ្រោះ​ការ​រឹប​អូស​ដី​ធ្លី​មួយ​ចំនួន​នៅ​ព្រឹក​ថ្ងៃទី​៩​ខែ​មករា​នេះ ​នាំគ្នា​ធ្វើការ​តវ៉ា​ជា​លើក​ទី​៣ ​នៅមុខ​ស្ថានទូត​រ៉ុស្ស៊ី​​ទាមទារ​ឲ្យ​មាន​ការ​អន្តរាគមន៍​ពី​រដ្ឋាភិបាល​រុស្ស៊ី​ដើម្បី​ដោះលែង​ឲ្យ​អ្នក​បកប្រែ​ ខ្សែ​ភាព​យន្ត​ឯក​សារ​ស្តី​អំពី​ការ​ជួញ​ដូរ​ផ្លូវ​ភេទ​រូប​នេះ​មាន​សេរីភាព​ឡើង​វិញ។​

អ្នកស្រី​ឡុង គឹមហ៊ាង​ ដែល​ជា​ភរិយា​របស់​លោក​រ៉ាត់ រត្នមុនី​ បាន​ប្រាប់​ក្រុម​អ្នក​សារ​ព័ត៌មាន​ថា ​ការ​តវ៉ា​ជា​ថ្មីនេះ​គឺ​ដើម្បី​ស្នើ​ដល់​រដ្ឋាភិបាល​រុស្ស៊ី​អន្តរាគមន៍​មក​រដ្ឋាភិបាល​កម្ពុជា​ដើម្បី​ដោះលែង​ប្ដី​របស់​អ្នកស្រី​ឲ្យមាន​សេរីភាព​ឡើង​វិញ។​ អ្នកស្រី​បញ្ជាក់​ថា​​ ការ​ផលិត​ខ្សែ​វីដេអូ​ឯកសារ​នេះ​ក៏​មាន​ជាប់​ពាក់ព័ន្ធ​នឹង​រដ្ឋាភិបាល​រុស្ស៊ី​ដែរ។​

ការ​តវ៉ា​នេះ ក៏​មាន​ការ​ប៉ះទង្គិច​​គ្នា​រវាង​អាជ្ញាធរ​ និង​អ្នក​តវ៉ា​ដែរ​ខណៈ​ពួកគេ​បាន​ព្យាយាម​ដង្ហែ​ក្បួន​បាតុកម្ម​ខាង​មុខ​ស្ថានទូត​រុស្ស៊ី។​ ទោះជាយ៉ាង​ក៏​ដោយ​ មិនមាន​មន្ត្រី​ស្ថានទូត​រុស្ស៊ី​ណាម្នាក់​ចេញ​មុខ​មក​ជួប​ឬ​ទទួល​ញត្តិ​របស់​ពួកគេ​នោះ​ឡើយ។​

លោក​រ៉ាត់ រត្នមុនី​ត្រូវ​បាន​តុលាការ​ចោទ​ប្រកាន់​ពី​បទ​ញុះញង់​ឲ្យ​មាន​ការ​រើស​អើង​តាម​មាត្រា​៤៩៦​នៃ​ក្រម​ព្រហ្មទណ្ឌ​ ដែលត្រូវ​ប្រឈម​ទៅ​នឹង​ការ​ជាប់​ទោស​ក្នុង​ពន្ធនា​គារ​ពី​១ឆ្នាំ​ទៅ​៣​ឆ្នាំ ពាក់​ព័ន្ធនឹង​ការ​ចូលរួម​ជួយ​ផលិត​ខ្សែ​ភាពយន្ត​ឯកសារ​ដែល​មាន​ចំណង​ជើង​ថា​«ម្ដាយ​ខ្ញុំ​លក់​ខ្ញុំ»​របស់​ស្ថានីយ៍​ទូរទស្សន៍ Russia Today​របស់​ប្រទេស​រុស្ស៊ី​ ហើយ​ដែល​រដ្ឋាភិបាល​កម្ពុជា​ចាត់​ទុក​ថា​ ជាការ​ធ្វើឲ្យ​ប៉ះពាល់​ដល់​កេរ្តិ៍​ឈ្មោះ​របស់​កម្ពុជា ​និង​ជា​រឿង​ដែល​មិន​អាច​អត់​ឱន​ឱ្យ​បាន៕​

© 2019, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.