តុលាការកំពូលនឹងបើកសវនាការបណ្តឹងសុំនៅក្រៅឃុំរបស់ អតីតអ្នកយកព័ត៌មានអាស៊ីសេរីជាលើកទី២នៅចុងខែនេះ

តុលាការកំពូលនឹងបើកសវនាការលើបណ្តឹងសុំនៅក្រៅឃុំរបស់ អតីតអ្នកយកព័ត៌មានរបស់វិទ្យុអាស៊ីសេរីជាលើកទី២នៅចុងខែកក្កដា តុលាការកំពូលគ្រោងបើកសវនាការជំនុំជម្រះលើបណ្តឹងសុំនៅក្រៅឃុំជុំទីពីររបស់អតីតអ្នករាយការណ៍ព័ត៌មានរបស់វិទ្យុអាស៊ីសេរី នៅថ្ងៃទី ២៣ កក្កដា ខាងមុខនេះ។

ក្រុមសិទ្ធិមនុស្សជាតិ និងអន្តរជាតិបានអំពាវនាវជាបន្តបន្ទាប់ឲ្យមានការដោះលែងអ្នកទាំងពីរឲ្យមានសេរីភាពឡើងវិញ។

មេធាវីការពារក្តីឱ្យអតីតអ្នកព័ត៌មានអាស៊ីសេរីទាំងពីររូប គឺ លោក កែវ វន្នី បានប្រាប់ក្រុមអ្នកសារព័ត៌មានកាលពីម្សិលមិញថា លោកបានទទួលលិខិតអញ្ជើញមេធាវីរបស់តុលាការកំពូល ឱ្យចូលរួមនៅក្នុង សវនាការជំនុំជម្រះបណ្តឹងសុំនៅក្រៅឃុំលើកទីពីរនេះ កាលពីសបា្តហ៍មុន។

លោកបន្តថា កូនក្តីទាំងពីររបស់លោក គឺលោក អ៊ួន ឈិន និង លោក យាង សុធារិន នឹងមានវត្តមានក្នុងបន្ទប់សវនាការពេលនោះ ហើយលោកបានត្រៀមខ្លួនរួចជាស្រេចក្នុងការតតាំងក្តីរឿងនេះ។

ជាងនេះទៅទៀត លោក កែវ វន្នី បានស្នើឲ្យ តុលាការកំពូលដោះលែងកូនក្តីរបស់លោកទាំងពីរមានសេរីភាពឡើងវិញ ដើម្បីបានទៅជួបជុំ ក្រុមគ្រួសារ ឡើងវិញ។

លោក អ៊ួន ឈិន និងលោក យាង សុធារិន ត្រូវបានសមត្ថកិច្ចនៃរបប លោក ហ៊ុន សែន ចាប់ខ្លួន កាលពីពាក់កណ្តាលខែ វិច្ឆិកា ឆ្នាំ ២០១៧ ពីបទផ្តល់ឱ្យរដ្ឋបរទេសនូវព័ត៌មានជាអាទិ៍ដែលនាំឱ្យអន្តរាយដល់ការការពារជាតិ តាមមាត្រា ៤៤៥នៃក្រមព្រហ្មទណ្ឌ។

អ្នកទាំងពីរអាចប្រឈមមុខនឹងការជាប់ពន្ធនាគារពី៧ឆ្នាំ ដល់ ១៥ ឆ្នាំ ប្រសិនបើតុលាការរកឃើញថា មានទោសមែននោះ។

សហគមន៍អន្តរជាតិបានថ្កោលទោសការចាប់ខ្លួន អ្នកទាំងពីររូបនេះ ដែលធ្វើឡើងដោយគ្មានភស្តុតាង និងគ្មានមូលដ្ឋានច្បាប់ត្រឹមត្រូវ៕

© 2018, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.